Prezidente IPG sesante, Hélio Casimiro Guterres, entrega serbisu ba Prezidente IPG foun, Gabriel Gaspar Aparício de Oliveira, iha salaun IPG, Delta, tersa (25/08). Imajen/Mídia IPG

DILI, 25 agostu 2020 (TATOLI)-Hafoin simu knaar foun, Prezidente Instituto Petróleu e Geologia (IPG), Gabriel Gaspar Aparício de Oliveira, hateten sei kontinua programa ne’ebé mak Prezidente sesante, Hélio Casimiro Guterres, ho ekipa sira prepara ona.

Programa prioridade ne’ebé IPG identifika ona maka peskiza hodi define no identifika kualidade bee-moos iha Timor-Leste, liuliu iha kapitál Dili tanba tuir nia durante ne’e ladun tau atensaun ba kualidade bee-moos.

“Programa prioridade sei foku maka bee-moos, ne’ebé maka povu sira konsumu loron-loron, tanba durante ne’e Governu ladun fó atensaun ba kualidade bee ba povu,” hateten Prezidente IPG Gabriel Gaspar, ba Agência Tatoli hafoin seremónia transferénsia podér hosi Prezidente IPG sesante ba Prezidente foun, iha salaun enkontru IPG, Delta, tersa ne’e.

Notisia Relevante: MPM nomea ona Gabriel Aparício sai Prezidente IPG foun

Ba inisiativa ne’e, intitutu ne’e rasik mai ona ho peskiza rasik katak maioria povu konsume bee galon no barak liu halo perfurasaun.

“Parte jeolojia ninian sei halo peskiza kona-ba kualidade bee ne’ebé povu konsumu no bee galon sira. IPG sei halo termu tékniku ida kona-ba estrategrafia,” nia akresenta.

Ba oin,  IPG sei foku mós ba rekursu mina-rai, tanba ne’e maka sei forma ekipa hodi bele halo estudu ba rekursu mina-rai iha Timór, halo estudu ba informasaun baze ida atu ba halo investimentu iha área ne’e.

Nune’e mós, sai prioridade atu estabelese laboratóriu IPG nian, tanba durante ne’e Governu ladún fó atensaun másimu ba IPG.

“Signifika IPG bainhira propoin orsamentu, maibé ikus mai Governu ko’a, entaun afeta tebes ba planu institutu ne’e ninia,” nia realsa.

Kona-ba programa durante mandatu, sei maihosi VIII Governu ne’ebé la’o ona durante tinan rua, maibé programa instituisaun rasik iha no kontinua nafatin programa ne’ebé iha ona.

Planu annuál ba instituisaun iha tinan 2021 ho ninia orsamentu submete ona ba Unidade Planeamentu, Monitorizasaun no Avaliasaun (UPMA) no Ministériu Finansa (MF).

“Ha’u mai ajusta tuir ida ne’e, maibé ha’u-nia planu ne’e bainhira Orsamentu Jerál Estadu iha tiha ona maka ajusta tuir orsamentu,” nia subliña.

Programa kontinuasaun iha tinan ne’e no 2021 mak reseita no transferénsia, dezenvolvimentu rekursu umanu, no programa intersetorál.

Enkuantu ba ninia sub-programa maka mapamentu, sentru divulgasaun informasaun, risku jeolójiku no rekursu umanu.

Prezidente IPG foun ne’e sei nafatin servisu hamutuk ho Prezidente sesante.

“Prezidente sesante iha esperiénsia tinan-ualu, ne’ebé ha’u presiza nia ein termu jestaun no konsulta ba nia saida mak la’o ona durante ne’e ein termu téniku, tanba nia ema jeólogu ne’ebé tenke hatúr filafali serbisu profisionál, maibé nia sei akompaña mós serbisu tékniku nian,” esplika Gabriel.

Entretantu iha seremónia transferénsia podér ne’e marka prezensa másimu hosi funsionáriu IPG.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here