Ministru Edukasaun Juventude no Desportu, Armindo Maia. Imajen/Egas Cristovão

DILI, 25 agostu 2020 (TATOLI)-Ministru Edukasaun Juventude no Desportu (MEJD), Armindo Maia, hamutuk ho Sekretáriu Estadu Juventude no Desportu, Abrão Saldanha, iha tersa ne’e halo ona diskusaun kona-ba planu implementasaun desportu eskolár iha Timor-Leste.

“Ohin ami halo reuniaun koordenasaun ba planu dezenvolvimentu desportu eskolár, entaun ohin ami ko’alia oinsá mak atu dezenvolve no prepara programa atu realiza atividade ne’e,” dehan Armindo Maia, ba Jornalista sira iha edifísiu  SEJD Lecidere.

Tanba programa ne’e sei enkaixa iha proposta Orsamentu Jerál Estadu (OGE) ne’ebé sei halo diskusaun iha Parlamentu Nasionál iha fulan hirak mai.

Iha fatin hanesan Sekretáriu Estadu Juventude no Desportu, Abrão Saldanha, hatete enkontru ne’e  faze primeiru oinsá atu trasa planu no programa hodi kria atividade desportu eskolár

“Atividade ne’ebé ita planu hanesan faze ida atu hametin baze desportu, ita ko’alia desportu tenke hametin ho nia baze, entaun nia baze mak desportu eskolár,” nia dehan.

Governante ne’e Governu sei haree mós kestaun infraestrutura liliu kampu futeból hodi hadi’a antes realiza atividade desportu eskolár.

“Ita la’ós problema ho infraestrutura de’it iha mós problema mak menus rekursu umanu ida ne’e sai problema maibé ami sei haree,”  katak nia.

Sorumutu ne’e hetan partisipasaun másimu husi, diretór nasionál hotu iha MEJD, SEJD no diretór edukasaun munisípiu.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here