Brigadeiru Jenerál João Miranda "Aluc Descartes". Imajen/Dok. Tatoli

DILI, 24 agostu 2020 (TATOLI)- Diretór Sentru Integradu ba Jestaun Krize, Brigadeiru Jenerál, João Miranda ‘Aluc Descartes’, ohin, iha Palaçio do Governo, hasoru-malu ho Primeiru-Ministru, Taur Matan Ruak, hodi ko’ali kona-ba posibilidade Governu atu extende tan situasaun Estadu Emerjénsia (EE) ba dalima.

Notísia Relevante : TL deteta tan kazu konfirmadu foun COVID-19

Brigadeiru Jenerál, ‘Aluc Descartes’ dehan,  númeru kazu COVID-19  iha nasaun viziñu Indonézia no Austrália agora sa’e maka’as, nune’e Governu presiza tempu hodi diskute asuntu ne’e kle’an iha reuniaun Konsellu Ministru para haree kestaun saúde hodi salva povu husi ameasa COVID-19.

“Ita hein Konsellu Ministru maka sei diskute, maibé ita haree katak situasaun agora ne’e sei mantein ho ritmu ida hanesan ne’e bele extende Estadu Emerjénsia,” hateten Brigadeiru Jenerál, ‘Aluc Descartes’

Nia lia tun tan dehan, “mezmu iha ita-nia rain kazu COVID-19 ne’e rejista ida de’it, mais moras iha ita nia país viziñu númeru sei maka’as. Ida-ne’e bolu atensaun ba ita  oinsá maka  ita prevene liuhosi medida prevensaun ne’ebé ita halo hela tenke forte,”.

Durante enkontru, Aluc Descartes aprezenta mós dadus kona-ba abitante Timor-oan no estranjeiru ne’ebé kumpre hela iha fatin konfinamentu obrigatóriu ka kuarentena sira iha Dili laran  no barak maka fila ona no balun sei kontinua hela hodi kumpre regra hodi ekipa saúde halo observasaun ba sira nia saúde durante loron-17.

Nia hatutan, atu loke hikas fronteira terrestre sira iha Timor-Leste, Governu presiza analiza situasaun COVID-19 iha nasaun viziñu, inklui haree númeru ema sira ne’ebé kumpre iha kuarentena menus ona foin bele foti desizaun atu loke fronteira.

Mezmu, servisu Sala Situasaun Sentru Integradu Jestaun Krize ensera ona iha  loron 30 jullu 2020, maibé  ekipa balun sei kontinua servisu apoia Ministériu Saúde ho parseiru sira kontinua fahe máskara no ajuda ekipamentu saúde nian ba povu sira hodi kumpre nafatin regra saúde nian.

Iha parte seluk, Xefe Governu Taur Matan Ruak, rasik husu ba Komandu Jerál PNTL liuhusi Unidade Patrullamentu Fronteira (UPF) no Komandu FALINTIL-Forsa Defeza Timor-Leste (F-FDTL) hodi halo seguransa maka’as kontrola liña fronteira hodi evita populasaun atu viajen hakur fronteira terrestre  no atividade negósiu ilegál.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here