Ministeriu Saude hamutuk ho ekipa re-abertura sistema saude iha familia iha Otel Novo Turizmu Dili.Imajen/Felicidade Ximenes.

DILI, 24 agostu 2020 (TATOLI)-Ministériu Saúde iha segunda ne’e, re-ativa ona programa sistema saúde iha família ba kada uma-kain iha Timor-Leste ne’ebé sei hahú fulan-setembru to’o dezembru 2020 iha Territóriu Timor-Leste.

Sistema saúde iha família la’ós de’it programa ida maibé modelu koletivu integradu ba prestasaun kuidadu saúde primária ne’ebé foku ba ema no ba família liuhusi vizita domisiliáriu regulár iha ámbitu ba vizita sistema saúde públiku no universál.

Ministra Saúde, Odete Maria Freitas Belo, hateten Ministériu re-ativa sistema saúde iha família tanba rekoñese progresu lubuk ida maka atinje ona durante tinan rua ba kotuk liliu hamosu estratéjia públika integrada ba pakote komprensivu prestasaun koidadu saúde primária.

Husi sistema saúde  iha família hamosu rejistu eletróniku ne’ebé aprezenta solusaun dijitál teknolojia husi loron ba loron hodi forñese dadus estatístika nasionál ba Ministériu Saúde.

”Elementu sentrál husi modelu intregadu ida ne’e mak servisu iha ekipa  saúde na familia ne’ebé iha Sentru Saúde no família sira kompostu husi grupu profisionál saúde envolve liliu ba vizita uma-kain sira ne’ebé mak iha no prestasaun pakote koidadu saúde primária liuhusi vizita domisiliáriu hanesan vizita rutina, regulár no  integral no mós vizita epidemiolojika,”  dehan Ministra Saúde bainhira re-abertura sistema saúde iha família ne’ebé hala’o iha Otél Novo Turizmu, ohin.

Governante ne’e husu ba profisionál iha Sentru Saúde no Postu Saúde sira atu estabelese orariu servisu diaria no semanal atu vizita kada uma-kain hodi fó tratamentu saúde ba komunidade.

MS konsidera sistema saúde iha família importante tanba atu lori tratamentu saúde ba komunidade to’o iha área rurál. Governu sei kontinua programa ne’e iha tinan 2021 hafoin projetu ne’e ramata iha fulan-dezembru 2020.

Partsisipa iha serimonia re-abertura sistema saúde iha família ne’e maihosi Diretór Saúde Munisípiu 12 inklui Rejiaun Administrativa Espriál Oé-Cusse Ambeno (RAEOA), Diretór Nasionál no mós Profisionál Saúde Munisípiu Dili.

Entretantu, sistema Saúde iha família, implementa hahú kedas iha mandatu Governu Konstituisaun daneen ne’ebé lideradu husi eis Primeiru-Ministru, Rui Maria de Araújo, maibé paradu ona durante besik tinan tolu ona.

Jornalista : Felicidade Ximenes

Editór       : Agapito dos Santos

1 KOMENTÁRIU

HAKEREK NO HATÁN

Please enter your comment!
Please enter your name here