DILI, 24 agostu 2020 (TATOLI)-Ajénsia Nasionál Avaliasaun no Akreditasaun Akadémiku (ANAAA), segunda ne’e fó ona formasaun ba reprezentante universidade privada no públiku hamutuk 18 husi Unidade Garantia Kualidade Interna ema na’in 40 kona-ba garante kualidade servisu retórial hahú husi reitór to’o dosente sira.
“Ida ne’e mak sira nia responsalblidade no sira nia kna’ar atu tau matan ba estrutura hodi bele fasilita lideransa hanesan magnífiku reitór, dekanu no dosente sira ba futuru,” informa Diretór Ezekutivu ANAAA, Edmundo da Silva Viegas, ba jornalista sira iha salaun Ian Martin INFORDEPE, segunda ne’e.
Edmundo fiar katak Unidade Garatia Kualidade Interna ka UGKI hanesan pontu fokál ne’ebé liga entre ANAAA ho kada universidade sira hodi garante nivel edukasaun ho kualidade iha Timor-Leste.
Ho prezensa UGKI mós bele tulun universidade no instituisaun Governu hodi atinje objetivu ida maka garante prosesu aprendijazen ida kualidade ba estudante Universitáriu iha futuru.
“Ami konsentra de’it ba Reprejentante UGKI husi Institutu Ensinu Superiór Públiku no Privada 18 ne’e atu atualiza fali sira nia koñesimentu kona-ba lalao’k UGKI nian atu sai forsa iha Instituisaun nia laran hodi ajuda reitór, vise reitór, dekanu no dosente sira atu hala’o sira nia kna’ar tuir SOP ne’ebé mak ida-idak trasa ona ba futuru,” tenik tan.
Entretantu, formasaun segunda ne’e parte ida husi programa ANAAA nian ne’ebé realizaoha worshop ida iha loron 16 fulan-jullu liubá ne’ebé hetan partisipasaun husi Ministru Ensinu Superiór Siénsia no Kultura, Longuinhos dos Santos ho Reitór universidade privada no públiku 18 iha Timor-Leste.
Jornalista : Tomé Amado
Editór : Agapito dos Santos
