Komandante Jerál PNTL, Komisáriu Faustino da Costa, Komandante Polísia Munisípiu Dili, Superintendente Xefe, Henrique da Costa no Segundu Komandante Polísia Dili, Euclides Belo, hala’o enkontru ho reitór Ensinu Superiór sira. Dili, 21 agostu 2020. Imajen/Eugénio Pereira

DILI, 21 agostu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa no Komandante Polísia Munisípiu Dili, Superintendente Xefe Henrique da Costa no Segundu Komandante Superintendente, Euclides Belo, ohin, hala’o enkontru ho reitór ensinu superiór sira iha Dili hodi sosializa programa “Polísia ba Kampus”.

Sensibilizasaun programa “Polísia ba Kampus” ne’e partisipa direita husi Reitór Ensinu Superior ka Universitáriu hanesan, Universidade Nasional Timor Lorosa’e (UNTL), Universidade da Paz (UNPAZ), Universidade Dili (UNDIL), Universidade Oriental Timor Lorosa’e (UNITAL), no Institutu sira hanesan, Dili Institute of  Technology (DIT) , Institute of Business (IOB), ISC, IPDC, ICS, no ICR.

 Komandante Jerál PNTL, Komisáriu Faustino da Costa dehan, programa ba kampus ne’e ho objetivu prinsipál hodi sensibiliza servisu PNTL nian hodi prevene kazu krime mosu no sosializa regra ba estudante sira hodi evita an husi kazu krime no konsumu ai-moruk droga no sosializa regra tránzitu nian.

Faustino dehan, Dili nu’udar kapitál nasaun tenke hakmatek hodi asegura seguransa durante oras 24 nia laran ba komunidade kapitál Dili too munisípiu hotu- hotu.

Komisáriu Polísia Faustino da Costa, agradese tebes ho prezensa lideransa ensinu superiór nia kontribuisaun atu servisu ho PNTL simu programa “Polísia ba Kampus”.

“Ha’u agradese tebes ho ita boot sira nia partisipasaun, liu-liu atu servisu hamutuk ho PNTL hodi simu programa “Polisia ba Kampus” hodi ita asegura di’ak liután servisu hametin paz iha ita-nia rain,” hateten Komisáriu Faustino da Costa, iha Komandu PNTL, Caicoli, Dili.

Fatin hanesan, Magnífiku Reitór UNPAZ, Adolmando Amaral dehan, sira-nia parte kontente hodi koopera ho PNTL halo sosializasaun programa prevensaun krime ba estudante universitáriu sira oinsá maka ba eskola atu aprende siénsia hodi sai estudante ida ne’ebé matenek no kualifikadu kontribui ba dezenvolvimentu.

Nia rekoñese katak, konflitu ida ne’ebé foin lalais mosu iha arredores UNPAZ konsege rezolve ho di’ak entre lideransa UNPAZ no família too ikus mosu duni konflitu ki’ik balun afeta tebes ba prosesu aprendizajen iha UNPAZ.

Iha fatin hanesan, Reitór Universidade Orientál Timor Lorosa’e (UNITAL), Florindo Pereira, hato’o agradese ba Komandu PNTL ninia programa hodi hakbesik ba universidade sira hodi buka rezolve problema.

Florindo hatutan, iha tinan kotuk UNITAL mós mosu beibeik problema krime organizadu, maibé agora komesa hakmatek ona.

Nia dehan, iha universitáriu rasik dala ruma mosu grupu organizasaun arte marsiál no grupu partidu polítiku.

UNITAL mós prontu koopera ho PNTL liu-liu Polísia Eskuadra Becora hodi sosializa regra lei hodi evita estudante labele envolve-an iha konflitu iha universitáriu.

Reitór UNDIL, Jose Belo dehan, sira-nia parte mós prontu koopera tanba UNDIL rasik dala barak mosu problema ne’ebé provoka husi grupu deskoñesidu iha li’ur hodi halo problema tama too arredores universidade nian.

Nia dehan, dala ruma estudante UNDIL sira sempre sai vítima, tanba hetan baku husi grupu juventude deskoñesidu balun no problema sira ne’e konsege rezolve, tanba kooperasaun servisu ho PNTL hodi fó seguransa.

Iha parte seluk, Reitora IPD, Madre Ervinia Brito dehan, sira  kontente bainhira hetan vizita hodi Komandante PNTL Dili, no Segundu Komandante PNTL, Euclides Belo, hodi halo enkontru ho estudante sira no sosializa programa “Polísia ba Kampus” nu’udar pasu importante ida hodi hametin paz.

Komandante Polísia Munisípiu Dili, Superintendente Xefe Henrique da Costa, espera ho enkontru ne’e bele hametin ona kooperasaun hodi PNTL implementa ninia programa vizita kampus sira hodi buka kria paz iha universitáriu sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here