Vise Prezidente Parlamentu Nasionál, Maria Angelina Sarmento. Imajen/Egas Cristovão

DILI, 18 agostu 2020 (TATOLI)—Vise-Prezidente Parlamentu Nasionál Deputada, Maria Angelina Sarmento Lopes, hateten to’o ohin loron Timor-Leste seidauk iha dadus índise dezigualdade jenéru.

“Dezafiu ba Timor-Leste mak to’o ohin-loron Timor-Leste seidauk iha dadus kona-ba Índise Dezigualdade Jéneru; nune’e mós dadus kona-ba ema sira-ne’ebé pelumenus ho ensinu sekundáriu maibé taxa mortalidade maternal sei aas (215 kada 10,000 inan ne’ebé hahoris iha 2018). Nune’e mós, taxa hosi adolesente sira ne’ebé ko’us mós aas tanba iha 33.8% hosi feto sira ho idade entre 15 no 19,” Deputada Maria Angelina ko’alia iha simpóziu nasionál ne’ebé organiza hosi Rede Feto no Fundação Pátria, iha salaun Tower, Fatuhada, Dili, tersa ne’e.

Nia hatutan, taxa partisipasaun forsa traballu feto mós sei ki’ik entre ema ho idade 15 ba leten, ho pursentu 25 de’it no mane kontribui ba 52.6% ne’ebé indika katak 75% hosi feto sira la tama ba kampu traballu nian.

“Bainhira ita kompara ida-ne’e ho país ida ne’ebé baixa liu iha Índise Dezenvolvimentu Umana, Nigeria, taxa partisipasaun feto nian atinji 67.3 no mane nian atinji 90.5. Ne’e hotu indika katak maski tuir Índise Dezenvolvimentu Umanu, Timor-Leste tama ona iha País ho Dezenvolvimentu Médiu, maibé bainhira uza indikadór sira seluk, entaun Timor-Leste seidauk hakat ba dook. Aliás dezafiu ne’ebé Timor-Leste sei enfrenta boot tebes,” nia dehan. 

Ohin-loron, nia dehan, Parlamentu Nasionál Kinta Lejizlatura nian rejista númeru deputada aas liu iha istória Timor-Leste nian ho númeru deputada 26 hosi 65 deputadu, nune’e kontribui 40% reprezentasaun feto iha Parlamentu Nasionál.  Persentajen ida ne’e, kuaze hanesan tiha ho Portugál no aas liu país sira seluk iha CPLP.

Maibé, nia haktuir, bainhira kompara ho reprezentasaun feto iha kargu Governu nian, Timor-Leste kontribui de’it kuaze 13%, ne’e persentajen ida ki’ik bainhira kompara ho Angola (34%), São Tomé do Prínsipe (33%), Portugál (30%), no Cavo Verde (21%).

“Kona-ba feto sira-ne’ebé eleitu sai xefe suku, iha eleisaun lideransa komunitária nian iha 2016, Timor-Leste kontribui 21 xefe suku feto (4.6%) de’it hosi totál suku hamutuk 452, tuir relatóriu hosi UN Women. Figura hirak ne’e hatudu mai ita katak ita presiza halo tan buat barak hodi nune’e bele eleva reprezentasaun feto nian iha polítika,” Vise-Prezidente PN ne’e fó hanoin liuhosi Simpóziu Nasionál ne’e.

Nia esplika, relatóriu ne’ebé iha, Timor-Leste hatuur nia aan iha pozisaun 131 hosi país sira hamutuk 189 ho pontu 0.626.

Maibé bainhira kompara Índise Dezenvolvimentu Umanu ne’e ho GNI per kapita, Timor-Leste hetan -14 iha 2018, ne’ebé halo Timor-Leste sai ki’ak liu fali Nigeria, país ida baixa liu iha Índise Dezenvolvimentu Umanu; 189), ho -3 no ki’ak liu fali Giné Bisau (178) ho ninian totál -2. Índise Dezenvolvimentu Umanu Timor-Leste nian ba 2020 agora tuun tan fali ba 133 hosi país hamutuk189, dala-ruma tanba tranzisaun polítika iha rai-laran iha tinan tolu nia laran.

Kona-ba CEDAW rasik, ONU iha mekanizmu ida hanaran Universal Periodic Review (UPR) hodi haree evolusaun direitus umanus iha Estadu Membru sira.  Timor-Leste tuir ona siklu UPR nian ba dala rua: dahuluk iha Outubru 2011 no daruak iha 3 Novembru 2016. Timor-Leste agora prepara an atu hetan revizaun ba siklu datoluk nian ne’ebé ajenda ona ba Janeiru–Fevereiru 2022.

Iha Marsu 2017, iha Plenária Konsellu Direitus Umanus ONU nian, Timor-Leste hetan 154 rekomendasaun maibé Timor-Leste simu de’it 146 rekomendasaun no anota rekomendasaun 8.  Hosi 146 ne’ebé simu ne’e, 14 natoon ne’e implementa ona no 118 seluk sei implementa hela.

Rekomendasaun 8 ne’ebé Timor-Leste anota ne’e tanba labele implementa tuir perspetiva sosiedade Timor-Leste nian.

Kona-ba diskriminasaun hasoru feto no igualdade jéneru, rekomendasaun balu ne’ebé pertinente tebes mak hanesan:

  1. Revee lejislasaun oin-oin ne’ebé iha konsekuénsia diskriminatória ba feto sira;
  2. Konsidera revee kódigu penál ne’ebé kontein medida punitiva hasoru feto sira-ne’ebé hala’o abortu ilegál;
  3. Kontinua implementa konvensaun internasioná oin-oin ne’ebé Timor-Leste ratifika ona relasiona ho direitu feto no labarik sira;
  4. Garante asesu justisa ba ema hotu, espesiálmente sira ne’ebé sai vítima ba violénsia seksuál no violénsia bazea ba jéneru oin-oin; no
  5. Kontinua implementa Deklarasaun Dili nian ne’ebé dehan katak atu kontinua investe iha feto no labarik sira ka investe iha igualdade.

“Ha’u hanoin ita presiza buat tolu atu hakat ba oin hodi hadi’ak ita-nia situasaun, servisu, servisu no servisu.  Ita presiza servisu maka’as ho matenek.  Ita presiza servisu hamutuk ho mane sira, ho instituisaun oin-oin, ho Governu, ho Igreija maibé, importante liu mak servisu hamutuk ho ita-nia feto maluk sira iha luta naruk ba igualdade jéneru ne’e, apezár de diferensa oin-oin ne’ebé ita iha, inklui diferensa polítika.  Ha’u dezeja susesu ho Simpóziu Nasionál kona-ba CEDAW ne’e atu sai nu’udar meiu ida hodi hafoun hikas ita-nia kompromisu atu servisu hamutuk atu avansa igualdade jéneru iha ita-nia rai doben,” hakotu Vise-Prezidente Parlamentu Nasionál ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here