Aviaun Air Asia. Imajen/Flight Global

DILI, 18 agostu 2020 (TATOLI)-Prezidente Autoridade Aviasaun Sivíl Timor-Leste (AACTL, sigla portugés), Ana Rosália Ximenes Varela, hateten ohin sidadaun xineza na’in-137 to’o Timor-Leste.

“Sidadaun sira-ne’e mai ho aviaun Air Asia husi Xina mai Dili no aviaun ne’e hetan ona flight approval husi Autoridade,” dehan Prezidente AACTL, ba Agência Tatoli via telefónika, tersa ne’e.

Tuir nia, sidadaun hirak ne’e maioria hanesan traballadór ne’ebé durante ne’e halo serbisu iha área infraestrutura privadu no públiku.

“Sira ne’ebé mai, hanesan traballadór no durante ne’e serbisu iha konstrusaun estrada sira hanesan konstrusaun Portu Tibar, Pelican Paradise no tékniku husi instituisaun sira,” nia informa.

Iha sorin seluk, Prezidente Ajénsia Navegasaun Aero Timor-Leste (ANATL), Romualdo da Silva, hateten aviaun husi Xina ne’e sei to’o iha Aeroportu Internasionál Prezidente Nicolau Lobato, Comoro iha lorokraik ne’e.

“Aviaun sei to’o lorokraik ne’e tuku 16:00,” nia informa.

Nia dehan, durante pandemia globál sidadaun na’in-137 ne’e sai hosi Timor-Leste ba Xina.

“Sira konserteza mai sei tama kuarentina, tanba ne’e hanesan protokolu husi Ministériu Saúde,” nia subliña.

Entertantu, horiseik aviaun Air Asia ne’ebé maihusi Xina repatria sidadaun xineza iha Timor-Leste hamutuk na’in-83.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here