Ofisiál F-FDTL iha selebrasaun Aniversáriu FALINTIL ba dala-44 iha Kuartél Jenerál F-FDTL, Fatuhada, 20 agostu 2019. Imajen Tatoli/António Gonçalves

DILI, 18 agostu 2020 (TATOLI)-Governu fó toleránsia pontu ba komemorasaun Loron Forsa Armada Libertasaun Nasionál Timor-Leste (FALINTIL) ne’ebé monu iha loron 20 agostu.

Governu konsidera entre loron ofisiál komemorativa sira, lei estabelese loron 20 agostu, hanesan loron ofisiál komemorativa ba Loron FALINTIL nian, ne’ebé tinan ida-ne’e selebra aniversáriu ba dala-45.

Tuir nota ofisiál ne’ebé Agência Tatoli simu iha tersa ne’e haktuir, bazeia ba Lei númeru 10/2005, loron 10 agostu, ne’ebé altera ona husi Lei númeru 3/2016 loron 25 maiu, Governu determina katak fó toleránsia pontu iha loron 20 agostu 2020.

“Toleránsia ne’e durante loron tomak, ba funsionáriu, ajente no traballadór hotu iha administrasaun direta Estadu nian, tantu servisu sentrál ka deskonsentradu sira, inklui organizmu sira husi administrasaun indireta,” subliña nota ne’e.

Toleránsia ne’e la inklui funsionáriu husi servisu públiku sira, tanba natureza atividade públika maka dezenvolve no tenke hala’o nafatin serbisu iha loron ne’e.

“Sein prejuizu ba kontinuidade no kualidade servisu públiku ne’ebé maka atu presta, dirijente másimu husi servisu públiku tenke fó dispensa ne’ebé hanesan husi devér asiduidade nian ba funsionáriu sira, iha loron seluk ne’ebé sei determina bazeia ba oportunidade,” nota ezekutivu esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here