Diretór Jerál Ministeriu Soliedariedade Sosial Rui Manuel Gago Exposto.Imajen/Tatoli Egas Cristovao.

DILI, 17 agostu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten pagamentu subsídiu $200 ba faze daruak nian, MSSI konsidera uluk ba xefe família ne’ebé mak rejista ona maibé naran la sai ka lakon iha momentu hala’o prosesu pagamentu ba faze dahuluk nian.

Notísia Relevante: Governu sei halo pagamentu subsídiu ba reklamante sira iha fulan ne’e

Rui Exposto hatutan, pagamentu subsidiu $200 ba faze daruak ne’e Governu Timor-Leste sei realiza iha fulan agostu ne’e nia rohan.

“Ita sei konsidera no tau prioridade uluk ba xefe família ne’ebé mak mai rejista mak naran lakon. Pagamentu ba faze daruak ne’e sei realiza iha fulan agostu ne’e nia rohan,” dehan  Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, ba Agência TATOLI liuhosi entrevista iha nia knaar fatin MSSI Caicoli, Dili, segunda ne’e.

Bainhira halo pagamentu, nia dehan, MSSI konsidera primeiru mak  suku no aldeia sira ne’ebé mak naran lakon totál hanesan Suku Camea ho aldeia rua (2), Suku Bidau iha aldeia ida, Postu Administrativu Maubara-Munisípiu Liquiça iha aldeia haat (4) no seluk tan.

Tanba, tuir nia, MSSI katak ema ne’e mai rejista ona iha suku no suku entrega ona mai iha munisípiu no submete hotu ba Ministériu Administrasaun Estatál (MSE) mak naran la sai ka lakon no la to’o mai iha MSSI, entaun tenke tau iha konsiderasaun uluk hodi ema mós bele hetan nia direitu hanesan hotu sira seluk.

Nia dehan, total reklamasaun hamutuk rihun 16 ne’e, xefe família balun rekomenda katak atu separa ka hasai naran sira hosi fixa familia no hakarak tau naran ketak ida hosi fixa família Ne’ebé sira prenxe tiha ona.

“Reklamsaun ida-ne’e laiha sentidu tanba ne’e parte MAE mak sei halo verifikasaun ba ida-ne’e. Ami-nia parte mak halo pagamentu bazea ba diploma ministeriál katak ema ne’ebé mak rejista ona mak naran la sai, ne’e sei iha direitu maibé rekomendasaun hirak ne’e dehan atu separa ne’e ita labele hatene,” nia dehan. 

Tanba ne’e, Rui Exposto hateten, presiza halo verifikasaun, avaliasaun no análiza didi’ak ba reklamasaun sira hafoin deside halo pagamentu. Tanba, nia dehan, hosi rekomendasaun rihun 16 barak mak ho razaun laiha sentidu tanba dehan COVID-19 ba hela tiha iha munsípiu.

Ba pagamentu faze daruak ne’e, nia hateten, MSSI tenta no kontinua koko atu halo pagamentu ne’e iha fulan agostu nia rohan. Se la biban, nia informa, entaun bele akontese iha setembru tanba reklamasaun hotu presiza koordenasaun entre parte relevante sira para oinsá labele hamosu problema bainhira halo pagamentu refere.

Bainhira Agência TATOLI husu kona-ba osan, nia hatán, ba kestaun orsamentu ne’e laiha problema tanba osan sei sufisiente hela hodi bele kobre ba reklamasaun hosi rihun 16 ne’e.

Jornalista : Osória Marques

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here