Xefe Suku Leohat, Jesuinha do Rosario, kahe tais ba Espoza Prezidente Repúblika, Cidalia Nombre Mouzinho Guterres. Imagen/Osória Marques.

MANATUTO, 14 agostu 2020 (TATOLI)–Espoza Presidente da República, Cidalia Mouzinho Nobre Gutteres, liuhosi  Gabinete de Apoio á Atividade do Cônjuge do Presidente da República (GAACPR) hala’o vizita iha Suku Leohat no Manlala, Postu Administrativu Soibada, Munisípiu Manatuto. Vizita ida-ne’e hanesan parte hosi aktu selebrasaun loron FALINTIL ba dala-45 (20 agostu 1975-20 agostu 2020) hodi hala’o asaun karidade ba komunidade sira iha suku Leohat no Manlala.

“Ami-nia objetivu hosi  vizita ida-ne’e atu selebra 20 agostu, loron FALINTIL nian ba dala-45. Entaun, ami adianta uluk mai vizita fatin Salau Suku Leohat, Postu Administrativu Soibada, Munisípiu Manatuto. Tanba ita hotu hatene katak fatin ida-ne’e nu’udár fatin istóriku ida-ne’ebé maka kuidadu ita-nia FALINTIL sira atu halo sira-nia servisu. Entaun kada tinan bainhira atu selebra loron istóriku FALINTIL nian, ami sempre iha atividade balu ho karatér sosiál, enatun ohin ami mai iha fatin ida-ne’e, aleinde adianta uluk loron FALINTIL nian no mós halo asaun karidade ba ita-nia komunidade sira,” dehan Espoza PR, Cidalia Lopes Nobre Mouzinho Guterres, ba jornalista sira hafoin vizita komunidade Suku Leohat-Manlala, sesta ne’e.

Inan nasaun ne’e hatutan, hosi vizita ida-ne’e Gabinete Prezidensiál hamutuk ho ofisiál Espoza Maijór Lere Anan Timur, Espoza Polísia Nasional Timor-Leste, aleinde vizita halo asaun karidade ho komunidade hodi fahe nesesidade báziku no sasan prevensaun  COVID-19 nian ba komunidade sira no mós fó materiál konstrusaun sanitária nian ba kbiit laek sira.

“Tanba ne’e maka ami hamutuk ho Espoza sira seluk fó apoiu nesesidade báziku hanesan foos, mina, Mi Sedaap no sasan prevensaun ba COVID-19 mak maskara, valde, sabaun, toailla,  no mós tulun ita-nia komunidade kbiit laek balu ne’ebé maka presiza materiál konstrusaun sira ne’ebé atu uza ba sirsa-nia presiza,” nia hateten.

Aleinde ne’e, espoza PR aproveita hodi vizita mós Eskola Ensino Básico Centrál São Bento Salau no Postu Saúde Salau hodi haree direta difikuldade saida maka durante ne’e eskola  no postu saúde ne’e hasoru.

Nia hateten, vizita ba eskola ne’e tuir formasaun ne’ebé diretór eskola rasik hato’o katak iha problema konstrusaun eskola ninian hanesan haris fatin no mós sala eskola. Tanba, kondisaun eskola ladi’ak bainhira tempu udan difikulta estudante sira-nia aprendizajen tanba udan been tama sala eskola no Postu Saúde Salau difikuldade ne’ebé médiku sira hasoru maka fatin la sufisienta atu atende ba pasiente sira.

“Iha vizitas ne’e, ami haree hotu ona sira-nia difikuldade no ami mós husu sira ne’ebé atu prepara sira-nia proposta atu haruka ba Gabinete Prezidensiál no mós ba Prezidente Repúblika, atu nune’e ba oin sira-nia preokupassaun sira-ne’e bele responde,” nia dehan.

Atividade hala’o vizita ne’e partisipa hosi Komandante Polísia Munisípiu Manatuto, Adminitradór Soibada,  autoridade lokál sira, veteranu Salau nian, no mós komunidade Suku Leohat-Manlala sira.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here