Prezidente Liga Futeból Amadora (LFA), Nilton Gusmão. Imajen dok. TATOLI

DILI, 15 agosto 2020 (TATOLI)-Rezultadu Kongresu Ordináriu Liga Futeból Amadora (LFA), iha sábadu ne’e, kongresista sira kontinua hili Nilton Gusmão, hanesan Prezidente LFA ba periodu tinan haat 2020-2023.

Klube 22 ne’ebé hamahan aan iha LFA divizaun dahuluk no daruak nian inklui fundadór sira halo votasaun ho votus afavór 32, kontra 0 no abstensaun 0.

Prezidente Eleitu, Nilton Gusmão, hateten durante ninia mandatu sei hadi’a kooperasaun ho Federasaun Futeból Timor-Leste (FFTL) no servisu arbitrajen no kestaun seluktan atu dezenvolve liután futeból iha Timor-Leste.

“Tinan hira mai tan, ita kontinua mellora di’ak liután iha arbitrajen nune’e bele hadia di’ak liután futeból iha ita nia rai. Dalabarak klube sira kestiona mak arbitrajen entaun ba oin ita sei hadi’a,” dehan nia iha Suai Room Timor Plaza Dili.

Atu dezenvolve desportu iha rai-laran, nia dehan presiza hetan kooperasaun hamutuk husi klube sira nune’e bele dezenvolve desportu.

“Ita hotu sei hamutuk mak bele hadi’a liga ida ne’e ba oin bele sai hanesan orgullu ida ba ita hotu nune’e bele hamosu paisaun nasionál ba futeból iha ita-nia nasaun,” tenik tan.

Entretantu, LFA estabelese iha fulan-dezembru 2015 husi fundadór na’in 10 hodi fó konfiansa ba Nilton Gusmão, atu lidera tan durante tinan haat 2015-2019.

Durante tinan haat ne’e konsege organiza ona jogu iha époka haat no konsege hasa’e prestasaun ba klube sira konsege lori ekipa kampiaun LFA époka dalima Lalenok United FC reprezenta Timor-Leste hodi partisipa jogu Asian Football Confederation iha Indonézia iha tinan 2019.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here