DILI, 15 agostu 2020 (TATOLI)–Liuhosi kongresu ordináriu ne’ebé realiza iha salaun Suai Room Timor Plaza, Dili, ohin, kongresista muda naran Liga Futeból Amadora (LFA) ba Liga Futeból Timor-Leste (LFTL).

Aprovasaun ba mudansa naran ne’e através vota aklamasaun ho votu a-favór 27, kontra 0 no abstensaun 0.

Liuhusi prosesu eleisaun ne’e, kongresista sira hato’o naran rua mak hanesan Liga Futeból Timor-Leste (LFTL) no Liga Futeból Timorense (LFT) maibé iha votasaun kongresista hili LFTL mak sai hanesan naran loloos ba Liga Timor-Leste.

Prezidente Meza Kongresu, Miguel Manetelu hateten liga nia naran mak muda maibé natureza liga la’o hanesan babain.

“Naran hosi liga mak muda maibé natureza liga nafatin,” dehan Manetelu iha Salaun Suai Room hafoin votasaun muda naran.

Naran ne’ebé muda ona via kongresu ordenariu ne’e hatudu katak Liga Timor-Leste hakat ona pasu ida bá-oin ho karáter profisionál.

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here