Prosesu re-inaugurasaun Parókia Santo António Baucau, sábadu (15/08/2020). Imajen TATOLI/Francisco Simões

BAUCAU, 15 agostu 2020 (TATOLI)–Bispu Dioseze Baucau, Mgr. Basílio do Nascimento, akompaña husi Padre Parókia Santo António Baucau, Pe. Manuel da Silva Ximenes, SDB ho saserdote sira, Madre no leigu sira  iha Parókia Baucau nian, ohin, ofisiálmente halo re-inaugurasaun ka re-konsagrasaun ba Igreja Parókia Santo António Baucau.

Re-konsagrasaun Uma-kreda ne’e liuhusi rituál sarani katóliku nian, hahú ho asina plaka husi Don Basílio do Nascimento, kontinua ho tesi fita iha Uma-kreda nia odamatan boot no fó bensaun ho bee-moris sarani nian hale’u Uma-kreda laran to’o li’ur no fó bensaun mós ba ambaun ka altár santu.

Molok serimónia re-konsagrasaun Uma-kreda Santo António Baucau, sarani atus resin ne’ebé halibur iha resintu Igreja Parókia nian to’o iha estrada Centro Convenção Baucau (CCB) simu Don Basílio do Nascimento, ho bidu no baku tambór husi grupu moradór  Baucau nian tuir lisan sira iha Baucau nian bainhira simu bainaka importante no espesiál.

Don Basílio re-inaugura Parókia Santo António Baucau. Imajen TATOLI/Francisco Simões

Sarani Parókia Santo António Baucau atus ua’in  ho ksolok tebes partisipa no asiste rituál serimónia inaugurasaun  Uma-kreda antigu ne’ebé harii iha Baucau Vila Salazar ka vila antiga nia futar fuan.

Tuir istória ne’ebé hatutan husi Bispu Eméritu, Mgr. Carlos Filipe Ximenes Belo, SDB, iha nia livru “Istória Parókia (Misaun) Baucau, katak hahú iha tinan 1878 bainhira Superiór no Vigáriu Jerál, Pe. António Joaquim de Madeiros, foti misionáriu husi Manatuto mak Amu-Lulik Manuel Maria Alves da Silva, ne’ebé hala’o knaar iha Manatuto, Laclo, Laleia, Vemasse, Baucau no Lautém.

Iha tinan 1879, Amu-lulik na’in-rua; Amu-Lulik Jacob dos Reis e Cunha (timoroan husi Laclo) no Amu-lulik Anacleto Cotrim Garcês (portugés). Tempu ne’ebá, amu-lulik uitoan de’it, mak padre superiór no vigáriu jerál troka sira lalais de’it.

Modelu Parókia Santo António Baucau ne’ebé re-inaugura ona iha sábadu ne’e. Imajen TATOLI/Francisco Simões

Ho previzaun loron 17 fevereiru 1886, sai hanesan pároku ba Parókia (Missaun) Baucau mak Amu-lulik Emídio José Temudo (ema portugés), nia harii kapela ki’ik-oan ida halo ho tali-tahan no hanorin iha eskola.

Re-konsagrasaun  uma kreda Santo António Baucau nian ne’e pertense mós ba selebrasaun tinan moris Padrueiru ka Mahein Parókia Baucau nian, Santo António de Lizboa ka Padua ba dala-825 nian (15 agostu 1195-15 agostu 2020).

Serimónia re-konsagrasaun uma kreda sarani Parókia Santo António Baucau nian ne’e mós nu’udar parte ida hodi selebra festa Asunsaun Nain-Feto nian, katak Maromak hasa’e Nain Feto ba Lalehan.

“Festa ne’e nia signifikadu boot liu, tanba Nai Maromak fó onra boot liubá ema, ne’ebé nu’udar Nai Maromak Nia ilas hodi hasa’e Nain-Feto Nia isin no klamar ba Lalehan,” hateten Don Basílio do Nascimento iha nia omília misa re-konsagrasaun Igreja Parókia Santo António Baucau.

Molok termina omília, Don Basílio do Nascimento, hato’o agradesimentu no parabéns ba sarani Baucau-oan hotu, ne’ebé lidera husi Padre Parókia Baucau, Pe. Manuel da Silva Ximenes, SDB, ne’ebé apoia no tulun ona Uma-kreda hodi hadi’a ka reabilita Igreja Parókia Santo António  to’o festa re-konsagrasaun ne’e.

Igreja Parókia Santo António ne’ebé sai mós nu’udar Igreja Katedrál Dioseze Baucau nian ne’e  halo reabilitasaun totál iha igreja laran no troka ornamentu antigu sira hodi halo Igreja laran sai furak no nabilan tebes.

Hola parte iha selebrasaun re-konsagrasaun Igreja Parókia Santo António Baucau, sarani sira Baucau-oan, Ministru Edukasaun, Juventude no Desportu, Armindo Maia ho família, membru Parlamentu Nasionál balun, korpu diplomátiku no konvidadu sira seluk tan.

Jornalista : Francisco Simões

Editór: Rafael Belo

HAKEREK NO HATÁN

Please enter your comment!
Please enter your name here