Diretór Eskola Báziku Sentrál (EBC-sigla portugés) São Bento Salau, João Manuel Tilman. Imajen/Osória Marques.

MANATUTO, 14 agostu 2020 (TATOLI)–Diretór Eskola Báziku Sentrál (EBC-sigla portugés) São Bento Salau, João Manuel Tilman, hato’o agradese ba Espoza Prezidente Repúblika (PR) Cidália Nobre Mouzinho Guterres, ho nia komitiva sira tanba fó apoiu materiál eskola nian no mós sasán prevensaun COVID-19 nian ba eskola ne’ebé nia lidera.

Notísia Relevante: Espoza PR enkoraja labarik sira estuda no estuda

“Ha’u lori eskola nia naran apresia no agradese tebes iha vizita espoza Prezidente Repúblika ho nia komitiva sira. Aleinde vizita, ami hetan mós asaun karidade distribuisaun materiál eskola nian liuliu ba alunu sira hanesan livru, lapizira, no mós sasán prevensaun COVID-19 nian maka hanesan máskara, toailla, sabaun, no valde,” dehan João Manuel Tilman ba jornalista sira iha Eskola EBC Salau, sesta ne’e.

Diretór Eskola ne’e hatutan, nia parte relata ba Espoza Prezidente Repúblika ho nia komitiva kona-ba difikuldade eskola nian hanesan kondisaun eskola ne’ebé grave bainhira udan monu-rai ne’e prezudika tebes ba ensinu aprendizajen.

“Ami mós aprezenta difikuldade hanesan kondisaun eskola nian ne’ebé grave tebes liuliu sala eskola nian. Sala sufisiente maibé kondisaun maka ladi’ak entaun iha tempu udan alunu sira labele hala’o apredensizasen tanba udan been tama ba eskola laran, ida-ne’e prezudika tebés ba estudante sira-nia atividade aprendizajen,” nia informa.

Aleinde kondisaun eskola nian ladi’ak, nia dehan, durante ne’e sira mós hasoru difikuldade rekursu-umanu tanba eskola ne’e iha Primeiru siklu to’o Terseiru siklu maibé profesór sira permanente ne’e hamutuk na’in-neen (6) de’it no seluk ne’e mesak kontratadu.

“Ita konta ba mai, iha difikuldade ida maka rekursu umanu. Tanba, primeiru Siklu nian Profesór permanente iha nain neen (6) no terseiru Siklu nain-11 ne’ebé hamutuk 16 maibé hosi ne’e kontratadu na’in-rua (2), parsiál na’in-tolu (3), ne’ebé ida-ne’e prezudika mós ba knaar tomak,” nia haktuir.

Nia informa, totál estudante sira ne’ebé iha eskola São Bento Salau hosi primeiri siklu to’o terseiru siklu ne’e hamutuk ema na’in-250 no sala eskola hamutuk sia (9), neen (6) ba primeiru siklu no tolu (3) ba treseiru siklu.

Nia informa, Durante iha tempu surtu COVID-19 ne’e, sira jere estudante primeiru siklu ba lorokraik no treseiru siklu ba dader. Nia dehan, , EBC São Bento Salau ho nia filiál hamutuk rua maka hanesan Pualaca no Barique.

Hatan ba difikuldade sira ne’e, Espoza Prezidente Repúblika, Cidália Nobre Mouzinho Guterres, husu Diretór Eskola atu haruka proposta ba Gabinete Prezidensiál no mós ba Prezidente Repúblika atu nune’e ba oin sira-nia preokupasaun ne’e bele responde.

Jornalista  :  Osória Marques

Editór        :  Cancio Ximenes

HAKEREK NO HATÁN

Please enter your comment!
Please enter your name here