Logo UNTL.

DILI, 14 agostu 2020 (TATOLI)-Grupu Estudante Peskizadór ba Asuntu Governansaun (GEPAC) husi Universidade Nasionál Timor-Leste (UNTL) sesta ne’e realiza semináriu kona-ba konsolidasaun demokrasia, paz no estabilidade ba dezenvolvimentu Nasionál relasiona ho situasaun polítika iha rai-laran.

Koordenadór GEPAC husi Departementu Siénsia Polítika UNTL, Jevedeus Francisco Monteiro Pinto, hateten semináriu ne’e iha ámbitu komemorasaun aniversáriu GEPAC.

“Ami nia intensaun realiza semináriu ida ne’e tanba ami preokupa ho situasaun rai-laran ne’ebé ohin loron sai polémika ida estrañu tebes iha ita-nia rain,” dehan nia ba Tatoli via telefone, sesta ne’e.

Oradór ba semináriu ne’e maka Donasiano R. Costa Gomes, Jurista no lideransa nasionál, Avelino Coelho, Deputada V lejislatura, Carmelita Moniz, no Diretór Ezekutivu Peace Center, Antero Bendito da Silva.

Nia esplika oradór na’in haat ne’e sei aprezenta temátiku difrente, oradór dahuluk maka Donasiano R Costa Gomes, ho tema Jeopolítika no Jeoestratejia aplikada iha Timor-Leste no mundu.

Jurista no lideransa Nasionál, Avelino Coelho sei ko’alia kona-ba direitu no dever Orgaun Soberanu ba Konstituisaun Repúblika Demokrátika Timor-Leste.

Oradór datoluk maka Deputada V Lejislatura, Carmelita Moniz, sei ko’alia kona-ba ejisténsia partidu opozisaun no prespetiva Konstituisaun Repúblika Demokratíka Timor-Leste.

No Oradór ikusliu maka Diretór Ezekutivu Peace Center, Antero Bendito da Silva, sei aprezenta kona-ba edukasaun nu’udar xave ida ba dezenvolvimentu Nasaun Repúblika Demokrátika Timor-Leste.

Entretantu, semináriu ne’e rasik realiza iha Kampus Antigu UNTL Caicoli Dili.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here