Logotipu TDD. Imajen Tatoli/Egas Cristóvão

DILI, 14 agostu 2020 (TATOLI)-Tribunál Distritál Dili (TDD), ohin, kontinua hala’o  julgamentu ba arguidu nain-rua ho inisiál  MC  no LDSL nu’udar ajente ka funsionáriu públiku iha Ministériu Obras Públika (MOP), Diresaun Água no Saneamentu Ambiente, Munisípiu Liquiça ne’ebé deskonfia komete krime pekulatu no falsifikasaun dokumentu agravadu ne’ebé fó prezuiju ba Estadu ho valor $29,578.15 .

Tuir Tribunál koletivu, liuhusi númeru prosesu 0023/18/PGGCC rekizita sertifikadu rejistu kriminál ba arguidu MC nu’udar xefe departamentu ba abastesimentu água Munisípiu Liquiça no arguidu LDSL, nu’udar ofisial iha finansas iha departamentu abastesimentu água Munisípiu Liquiça.

Tuir faktu  ne’ebé arrola husi  Ministériu Públiku  (MP)  akuza no aprezenta ba Tribunál, hateten iha indísiu ne’ebé natoon katak,  arguidu MC, hahú servisu iha Ministériu Obras Publika, Dirasaun Jerál Servisu Água no Saneamentu, iha loron 17 setembru 2002  no iha 2004, arguidu hetan transferénsia husi Ministériu Obras Públiku Nasionál ba iha Munisípiu  Liquiça hanesan Manager Water Supply no Sanitation to’o 2011, no iha tinan 2012 to’o 2016 arguidu asume kargu hanesan xefe  departamentu ba Abastesimentu Água Munisípiu Liquiça (DAAML), no iha tinan 2017 to’o agora, arguidu asume kargu nu’udar Diretór ba Diresaun Servisu Água, Saneamentu no Ambiente iha Munisípiu Liquiça.

Arguidu LDSM hahú servisu nu’udar funsionáriu iha Ministériu Obras Publika, Dirasaun Jerál Servisu Água no Saneamentu iha Departamentu ba Abastesimentu Água iha Munisípiu Liquiça (DAAML)  hanesan funsionáriu kontratadu iha tinan 2009, hafoin iha janeiru 2013/2014, arguidu foin sai hanesan funsionáriu permanente.

Arguidu mós hanesan fasilitadór ba Postu Administrativu (FPA) husi 2009 to’o agora, no iha tinan 2015, arguidu MC  nomea bervalmente ba arguidu  LDSM  sai hanesan ofisial finansa iha DAAML, tanba arguidu LDSM  mak iha koñesimentu  ba programa Microsoft Excel, kompara ho funsionáriu sira seluk, maske tuir faktu  iha mós funsionáriu balun ne’ebé iha mós koñesimentu ba programa  Microsoft Excel.

Arguidu MC nu’udar Xefe Departamentu Abastesimentu ba Água Munisípiu Liquiça (DAAML) ho ninia kompeténsia servisu mak orienta pesoál operasaun, halo enkontru ho lider lokál kada fulan, simu proposta husi komunidade kona-ba bee-mós no saneamentu, halo enkontru ho parseiru dezenvolvimentu, halo kontrolu ba funsionáriu tomak departamentu nian, halo kontrolu ba servisu administrasaun no finansas, prepara planu no relatóriu anuál hodi submete mai Diresaun Nasionál Servisu Água, (DNSA), Dili.

Arguidu LDSL nu’udar Ofisial Finansa iha tinan 2015 to’o 2016, nia servisu mak simu proposta ka pedidu husi servisu rural no urbana, ezekuta fundu adiantamentu operasionál nian, no ikus halo relatóriu ezekusaun orsamentu fundu adiantamentu kada fulan tolu (3), hahú husi janeiru 2015 to’o dezembru 2016 iha Departamentu Abastesimentu Água Munisípiu Liquiça.

Planu asaun annual fundu adiantamentu iha tinan 2015  to’o 2016, ba departamentu sira la halo, tanba orsamentu ba fundu adiantamentu commit tiha ona iha Ministériu Obras Publika (MOP), iha Dirasaun Nasionál da Água liuhusi CPV no mós payment request, rejistu despeza, katak departamentu ida-idak iha munisípiu, kada trimestral sei hetan fundu refere ho montante $9,000.00.

Iha tinan 2015, arguidu sira simu osan fundu adiantamentu ba trimestre I to’o trimestre  III ho montante $27,000.00 no iha tinan 2016, arguidu sira simu osan fundu adiantamentu ba trimestral I no II de’it  ho montante $18,000.00. Nune’e, total fundus osan períodu tinan 2015 to’o 2016 ho montante global $45,000.00.

Iha tinan 2015 to’o 2016, prosedimentu atu foti fundu adiantamentu, tenke hetan autorizasaun husi Dirasaun Jerál Finansas no kooperativa, Ministériu Obras Públikas, no fundus ne’e atu foti iha banku tenke liuhusi check  ne’ebé mak tenke ema na’in-tolu  mak asina, ne’ebé kompostu husi Diretór Nasionál Servisu de Agua (DNSA), Gustavo da Cruz), Xefe Departamentu Abastesimentu da Água Munisípiu Liquiça (DAAML-arguidu MC), no Ofisial Finansas DAA Munisípiu Liquiça (arguidu LDSL).

Fundus ne’e rai iha Banku, no arguidu LDSL maka ba foti fundus ho montante $9,000.00 kada trimestral, ho karta autorizasaun husi superiór, ne’ebé arguidu MC mak rai, no osan sira ne’ebé arguidu LDSL ba foti iha banku ne’e arguidu MC deside katak tenke tau  iha branka ne’ebé mak rai iha nia fatin, tanba seguru liu no kódigu husi branka, xave odamatan no xave gaveta ne’e arguidu MC  mak kaer no rai. Maibé atu asesu ba kódigu branka nian ne’e arguidu na’in-rua (2)  mak responsabiliza no sempre asesu ba branka ida-ne e.

Arguidu na’in-rua (2) foti osan husi branka maibé laiha slip patty cash atu justifika osan hira mak sei iha branka.

Ezekusaun fundus adiantamentu ne’e, depende ba planu atividade no pedidu orsamentu husi funsionáriu sira ne’ebé servisu iha urbana, liuhusi responsavel sira mak hanesan Martinho de Jesus (kanalizadór), Filipe Correia dos Santos (operadór no Kanalizadór), Silvano dos Santos (Senior Tékniku), Ana Manuela da Cruz (Tékniku Dezeñu), Jorge Pereira Martins (tratamentu bee), no mós funsionáriu sira iha area rural, liuhusi responsavel sira  Zélia Maria da Cruz dos Santos, Onofre Maria dos Santos,  Hermínio da Costa Soares no arguidu LDSL, iha kada seksaun iha ne’ebé mak hato’o ba iha arguidu MC nu’udar Xefe Departamentu, liuhusi iha Departamentu DAA, arguidu LDSL nu’udar ofisial administrasaun no finansas, depois mak arguidu MC hatún despaxu autorizasaun ba iha arguidu LDSL nu’udar ofisial finansas.

Hafoin arguidu MC  foin entrega xave gaveta ba arguidu LDSM hodi foti xave branka ho ninia kódigu atu loke branka no akompaña husi arguidu MC hodi foti osan ho montante tuir pedidu, hodi selu perdiem, selu traballadór, sosa material, no seluk tan, depende ba planu.

Iha tinan 2015 to’o 2016, Departamentu  Abastesimentu Água (DAA) Munisípiu Liquiça iha funsionáriu públiku permanente ema na’in-13, funsionáriu kontratadu na’in-lima (5), funsionáriu kazuál na’in-neen (6) no funsionáriu kontratadu sira ne’e, arguidu na’in-rua (2) halo kontratu eskrita kada trimestral ka kada semestrál, ho saláriu kada fulan entre $115.00, no funsionáriu kontratadu sira-ne’e simu kada trimestral.

Relasiona ho funsionáriu kazuál sira, arguidu na’in-rua halo kontratu verbal katak karik iha servisu ruma hanesan atu halo manutensaun no operasaun ruma, maka arguidu MC mak fó orientasaun verbal ba iha arguidu LDSL hodi ba bolu ema sira mai atu ajuda tanba funsionáriu ba manutensaun no operasaun ne’e nain rua (Martinho de Jesus no Silvano dos Santos), hodi selu sira kada fulan $85.00, no funsionáriu kazuál sira ne’e simu kada trimestral.

Iha tinan 2015 arguidu MC  selebra kontratu ho funsionáriu kontratadu hamutuk ema na’in-neen (6)  ho saláriu kada fulan $115.00, maibé iha tinan 2016, arguidu MC fó orientasaun verbal ba arguidu LDSL hodi selu de’it sira nia saláriu kada fulan $80.00, tanba volume servisu ladún barak, maske iha kontratu hakerek saláriu kada fulan $115.00.

Nune’e mós ho funsionáriu kazuál, maske la kontratu eskrita, iha tinan 2015 arguidu sira selebra kontratu verbal katak funsionáriu kazuál kada fulan simu saláriu ho montante $85.00, maibé hahú husi terseiru trimestral tinan 2015 ate segundu trimestral 2016, arguidu selu funsionáriu kazuál sira ne’e ho saláriu kada fulan $25.00 to’o $50.00, ne’ebé simu dala ida iha kada trimestral.

Arguidu sira mós la halo pagamentu ba funsionáriu públiku permanente, kontratadu no mós kazuál sira halo servisu sira hanesan halo liña transmisaun no distribuisaun bee-moos. Ba mós kaptasaun, hadi’a tanke kaptasaun, halo instalasaun painél bomba, solda raak, hadi’a armazén material be’e nian, halo kontrolu, iha area Metagou, Bebonu Lua, RSS Blok A. B & C. Mankala-Lauhata, Kota Lara, Sarlema, Maumeta, Da Ulo, Rac Sape, Kirelelo, Kamalelara. Rae Goa, Gouilo, Laklo Gouilo, Ana Loa, maibé arguidu na’in-rua  (2) fornese de’it mak hahán  hanesan etu falun ida ho presu $1.75, be água $0,25, maibé arguidu na’in-rua halo lista pagamentu uza funsionáriu sira nia naran ho montante $60.00, no falsifika funsionáriu sira nia asinatura, maske iha realidade funsionáriu sira ne’e balun la hetan pagamentu.

Arguidu LDSL mak prepara dokumentu no arguidu MC mak autoriza, falsifikasaun naran, asinatura no mós aumenta loron viajen funsionáriu sira nian balun, iha MOP, falsifika iha lista pagamentu perdiem ba funsionáriu permanente no mós kontratadu sira nia naran balun iha periodu tinan 2015 no 2016, ne’ebé halo dezlokasaun husi Munisípiu Liquiça mai Dili, entre husi loron metade to’o loron-rua (2), ho montante entre $20.00 to’o $60.00/loron, maske iha realidade iha funsionáriu balun mak la halo viajen no funsionáriu balun ne’ebé halo duni viajen maibé simu perdiem la tuir lista pagamentu ne’ebé  mak arguidu sira prepara, no funsionáriu balun hela iha Dili mós hetan perdiem ba viajen lokál nian.

Falsifika asinatura 29, arguidu MC mós fó orientasaun verbal ba iha arguidu LDSL mós falsifika mós fatura kompras material ka ekipamentu água no saneamentu nian no mós material ATK sira iha tinan 2015 to’o 2016, iha loja sira ne’ebé balun eziste duni iha Munisípiu Liquiça no mós naran loja balun ne’ebé mak la eziste iha Munisípiu Liquiça, loja Zili Unipesoal, loja Kalosa, loja Espada, no Loja Alini Maubara la fa an material konstrusaun, inklui loja balun iha Dili mós la eziste mak hanesan Loja Senoko Naroman.

Iha autos, no mós inventa naran material no mós presu sasán sira ne’e iha resibu loja nian, maske iha realidade sasán sira-ne’e balun arguidu sira sosa, no iha sasán sira balun mak arguidu sira sosa maibé inventa fatura falsu no sasán ninia montante no mós presu.

Atu garante balansu ezekusaun fundus adiantamentu kada trimestral husi janeiru  2015 to’o dezembru 2016, bele ezekuta hotu ka zero, maka arguidu MC fó orientasaun verbal ba iha arguidu LDSL, atu falsifika naran no asinatura husi funsionáriu permanente, kontratadu no mós kazuál sira-nian iha lista pagamentu, inventa loron orden servisu ka MOP ba atividade ka loron viajen nian (perdiem), diminui saláriu traballadór sira-nian, ba sira kontratadu husi $115,00 hatún ba $80,00 no ba kazuál husi $85,00 (hatún ba $50.00 to’o $25.00, maibé  lista pagamentu nafatin, inklui falsifika resibu ka fatura husi loja sira nian.

Aleinde ne’e, arguidu MC  mak prepara dokumentu ID falsu ba ema sira ne’e la’ós funsionáriu, hafoin entrega ba arguidu LDSL hodi prepara dokumentu lista pagamentu falsu no asinatura falsu.

Dokumentu sira-ne’e hotu arguidu LDSM  prepara no halo asinatura falsu hafoin mak arguidu MC  mak halo aprovasaun.

Arguidu sira halo ida ne’e ho objetivu atu nune’e bele hetan fali fundus adiantamentu trimestral sira tuir mai, maske osan iha branka ba períodu trimestral anterior nian sei iha hela branka, maibé arguidu sira uza tiha ba sira-nia interese partikulár, hafoin halo justifikasaun ba gastu  ho lista pagamentu perdiem falsu, lista pagamentu ba traballadór falsu  no mós fatura husi loja sira falsu.

Rezultadu husi konduta arguidu na’in-rua  ne’ebé komete hahalok falsifikasaun ba perdiem no falsifikasaun lista pagamentu traballadór ba funsionáriu permanente, kontratadu no kazuál sira, no mós halo falsifikasaun fatura loja sira-nian, durante janeiru 2015 to’o dezembru 2016, iha Departamentu Abastesimentu ba Água iha Munisípiu Liquiça  (DAAML) hamosu prejuizu ba Estadu Timor-Leste ho montante global $29,578.15.

Ho diskrisaun faktu tanba falsifikasaun ba perdiem ho montante $7,870.00, falsifikasaun ba lista pagamentu ba traballadór sira ho montante $18,940.00 no falsifikasaun ba fatura loja sira-nian ho montante $2,768.15,  konfere relatóriu investigasaun.

Arguidu MC no arguidu LDSL, hatene katak Ministériu Obras Publika, Transporte no Komunikasaun, Diresaun Nasionál Servisu ba Água, Departamentu Abastesimentu ba Água, aloka hela orsamentu adiantamentu ba Departamentu Abastesimentu ba Agua iha Munisípiu Liquiça nu’udar orsamentu Estadu nian, ne’ebé entrega ba iha arguidu sira na’in-rua (2) ninia responsabilidade hodi jere tanba sira nia funsaun atu ezekuta osan sira ne’e tuir lei hodi garante fornesimentu bee-moos ba komunidade sira iha area rurál no mós urbana iha Munisípiu Liquiça, maibé arguidu na’in-rua  (2) dezvia tiha osan sira ne’e, liuhusi hahalok ne’ebé kontra lei  hodi hamosu prejuizu ba Estadu.

Arguidu na’in-rua (2) mós hatene nu’udar funsionáriu públiku iha Ministériu Obras Publika, Transporte no Komunikasaun, Diresaun Nasionál Servisu ba Água, Departamentu Abastesimentu ba Água iha Munisípiu Liquiça, prepara dokumentu MOP falsu, lista pagamentu falsu, fatura falsu, inklui abuzu funsionáriu seluk nia asinatura, hodi hetan benefísiu ilejítimu ba sira nia-an hodi hamosu prejuizu ba Estadu.

Arguidu na’in-rua (2) nu’udar  autór material ho forma konsumada ba konkursu real ba krime pekulatu ne’ebé previstu punidu tuir artigu  295° n° 1 no 3, husi Kódigu Penal   no krime falsifikasaun agravadu, ne’ebé previstu punidu tuir artigu 303° n° 1 al. a) no art. 304′ n° 2 husi Kódigu Penal.

Hatán ba akuzasaun MP nian, antes ne’e, arguidu na’in-rua konfesa ba Tribunál, katak faktu sira balun loos no  balun lae. Tanba tuir arguidu sira  iha razaun servisu administrasaun nian.

Sasin CC nu’udar funsionáriu administrasaun Água Saneamentu Munisípiu Liquiça deklara ba Tribunál katak, nia parte laiha koñesimentu ba kazu ne’e  tanba antes ne’e servisu ne’ebé nia hala’o hanesan iha administrasaun  mak hanesan atende hodi haree tuir lista prezensa funsionáriu kazuál simu keixa hosi komunidade ba  kanalizasaun bee-moos, Tanba ne’e, nia dehan, ba prosesu sira seluk nia parte laiha koñesimentu.

Hafoin rona sasin, Tribunál deside  adia fila-fali  julgamentu ne’e ba iha loron 14  setembru, tinan ne’e, tuku 09:00 dadeer,  hodi rona sasin sira seluk.

Julgamentu ne’e prezide husi  Juis koletivu, Maria Modesta, Maria Solana no João Ribeiro, Ministériu Públiku reprezenta Prokuradór  Rogério Viegas, no arguidu sira hetan asisténsia husi advogadu privadu Marito da Silva, Ismael Lopes no Adelaide.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here