Segundu Komandante Polísia Munisípiu Dili, Superintendente Asistente Euclides Belo. Imajen/Antonio Goncalves

DILI, 13 agostu 2020 (TATOLI)- Komandu Polísia Munisípiu Dili liuhusi Eskuadra Polísia Atauro, kuarta (12/08), purvolta tuku 22:00 Otl,  kaptura sidadaun estranjeiru ida husi Nova Zelándia no ida seluk husi Indonézia ne’ebé halo viajen tama ilegál mai husi área fronteira Liran-Indonézia liu Aldeia Acrema, Suku Biqueli, Postu Administrativu Atauro, Munisípiu Dili.

Sidadaun estranjeiru ho inisiál Jhon no Indonéziu ida ne’e, PNTL kaptura hafoin hetan keixa husi populasaun na’in-rua husi área Acrema nian.

Hafoin kaptura sidadaun  estranjeiru na’in-rua ne’e, PNTL no autoridade sira halo mós apreensaun ba sasán balun hodi lori kedas sira  ba ekipa COVID-19 Atauro hodi halo teste saúde, iha Sentru Saúde Atauro.

Segundu Komandante PNTL Munisípiu Dili, Superintendente Euclides Belo, dehan parte PNTL Atauro sei halo hela prosesu investigasaun ba sidadaun estranjeiru na’in-rua ne’e hodi buka hatene sira ninia viajen ilegál husi Liran-Indonézia tama mai Timor-Leste.

“Hodi kalan akontese sidadaun estranjeiru ho naran Jhon tinan 67 orijen husi Nova Zelándia no ida husi Liran, Indonézia ne’ebé mai ho ró hatún iha fronteira Acrema Uara-Ana nian maka komunidade sira hetan hodi hato’o keixa ba polísia halo kedas atuasaun,” dehan Euclides Belo, ohin, ba jornalista liuhusi konferénsia imprensa iha Kuartél Jerál PNTL, Caicoli, Dili.

PNTL no Unidade Polisia Marítima no Unidade Forsa Navál FALINTIL-Forsa Defeza Timor-Leste (F-FDTL) iha kalan ne’e halo kedas halo operasaun no apreensaun ba ró ne’ebé sira uza hodi submete ba prosesu investigasaun.

“Ita nia polisia sei investiga mós sidadaun Liran hodi buka hatene oinsá mak sira bele tama too fali mai Atauro hodi ita bele hetan informasaun klaru,” nia hateten.

Iha parte seluk, Administradór Postu Administrativu Atauro, Mateus Belo deklara tuir informasaun ne’ebé nia parte rekolla husi autoridade suku haktuir katak, sidadaun Nova Zelándia ne’e halo viajen ho ró husi Surabaya-Indonézia liu área tasi entre Timor-Leste no Indonézia maka ema balun dudu nia monu ba tasi laran, ho nune’e, nia tenta nani iha tasi laran too hetan ajuda husi peskadór na’in-rua maka salva nia vida hodi lori fali ba parte área Acrema-Buarana nian.

Parte Autoridade Atauro rasik entrega ona sidadaun ne’e ba parte PNTL hodi kontinua halo investigasaun.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here