Bee-moos. Imajen/Espesiál

DILI, 13 agostu 2020 (TATOLI)-Eskola Ensinu Báziku Filiál I,II no III Lelaus Dare Munisipiu Dili, durante tinan 20-resin ona sei kontinua enfrenta  problema falta bee moos.

Koordenadór Eskola, Abríl Soares, hateten ho problema falta bee moos ne’e maka implika ba prosesu aprendizajen estudante sira ninian susar atu kumpre padraun Ministériu Saúde no Organizasaun Mundiál Saúde ba progpagasaun surtu COVID-19.

Notísia Relevante :Eskola 28 Novembru Preokupa Bee no Eletrisidade

Daudaun ne’e, Eskola refere instala ona tanke fase liman ba estudante sira maibé problema maka laiha bee moos, tanba ne’e lorloron obrigatóriu ba kada estudante idaidak tenki lori bee moos husi uma bá eskola.

“Ami tenki implementa duni regras kada estudante tenki lori bee litrus lima husi uma se lae ami labele re-ativa eskola ne’e, tanba ami laiha bee ne’ebé besik eskola,” informa nia ba jornalista sira iha Dare, kinta ne’e.

Nia hateten eskola ne’e ejiste ona hahú kedas okupasaun Indonézia  iha tinan 1994, maibé to’o agora seidauk asesu ba bee moos, maski relata bebeik ona problema ne’e ba Governu.

Koordenadór EBF Lelaus Dare ne’e husu ba Governu liuhosi Diresaun Agua no Saneamentu atu fó atensaun ba kestaun ne’e.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here