Komemora loron Mundial Juventude sira halao marsa husi Palacio governu nia oin ba to iha Xanana Reading Room Lecidere, Kuarta 12 Agostu 2020.Imajen/Antonio Goncalves

DILI, 12 agostu 2020 (TATOLI)-Koordenadór Sala Leitura Xanana, Manuel Rebelho Soares, hateten Timoroan liliu Joven sira tenki hatoman a;an ho kultura le’e barak  hodi hasa’e koñesimentu  pesoál no mós sai inspiradór ba ema seluk bainhira hasoru dezafiu.

Nia hato’o pedidu ne’e durante kampaña kona-ba importansia le’e ho tema “Hakbi’it Foinsa’e Sira Liuhosi Kultura Le’e” ho atividade  marsa la’o ain husi Jardim Palacio do Governo ba to’o Largo Lecidere Dili, iha kuarta ne’e.

“Ami-nia esperansa katak joven sira labele sai de’it instrumentu ba polítika maibé tenki hatoman a’an hodi le’e barak hodi sai fali inspiradór ba ema seluk,  husi le’e barak mak ita sei koñese buat barak no sei hatene mós mundu nia luan,” dehan nia ba Tatoli iha Largo Lecidere.

Sala Leitura Xanana seidauk iha dadus estatístika ne’ebé rekoilla Timoroan liliu joven na’in hira hatoman a’an ho kultura le’e barak, maibé tuir observasaun lorloron nota kada loron husi ema na’in tolu to’o 10 sempre le’e iha fatin ne’ebá.

Atu hakbi’it koñesimentu joven sira atu le’e barak, Odamatan Sala Leitura Xanana kontinua nakloke ba vizitante sira atu le’e barak liután.

“Ami nafatin fo suporta ba maluk  joven sira atu hamri’ik firmi hodi sai ezemplár ba Timoroan hotu, tan ne’e atu sai joven ida di’ak tenki le’e barak hodi sai joven ne’ebé forte hodi dezenvolve nasaun Timor Leste,”tenik tan.

Nia hatutan sala leitura Xanana durante ne’e fó ona oportunidade ba joven sira hodi transforma sira nia-a’an iha Youht Community Care hodi ejizte to’o ohin loron.

Kampaña kona-ba importansia le’e ne’e hodi komemorasaun loron mundiál ba juventude.

Entretantu, Sala Leitura Xanana Gusmão estabelese ona iha tinan 2000 liubá, hanesan Organizasaun Naun Luxru ho objetivu hofi fó asisténsia ba públiku tomak  liliu komunidade no estudante sira atu asesu livru, bibliotéka informasaun no rekursu edukativu, Internet no Muzeu, treinamentu no formasaun no seluk tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here