Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

DILI, 12 agostu 2020 (TATOLI)- Iha primeira semana, loron 4 too loron 12 agostu tinan ne’e, Komandu Polísia Nasionál Timor-Leste (PNTL) rejista asidente tráfegu ne’ebé akontese iha territóriu Timor-Leste rezulta vítima na’in-neen (6) mate fatin,  na’in-10 kanek todan no na’in 59 sofre kanek kaman.

Tuir relatóriu investigasaun ne’ebé Komandu PNTL rekolla haktuir katak, vítima sira ne’ebé mate maioria ho motór soke no pankada maka’as tanba fatór umanu uza transporte ho velosidade.

“Iha semana ida ne’e ita rejista kazu asidente hamutuk lima no ema mate na’in-neen, kanek kaman na’in-59, kanek todan na’in-10, sira seluk kanek baibain,” informa portavós Komandu Jerál PNTL Superintendente Xefe Arnaldo Araújo, ohin, ba jornalista iha Komandu Jerál PNTL, Caicoli, Dili.

Vítima sira ne’ebé mate hetan asidente tráfegu motór rua loron sesta feira (07/08/2020) iha área Portu Dili oin rezulta sidadaun Indonézia ida mate fatin ne’ebé tuir planu, kinta aban (13/08) sei transporta mate isin fila ba Indonézia liuhusi fronteira Batugade.

Iha loron hanesan  akontese mós asidente tráfegu motór ida iha área Manatuto nian rezulta vítima ida mate fatin.

Iha domingu (09/08) motór rua soke malu iha área Fomentu Comoro rezulta vítima na’in-rua mate fatin no iha fali segunda (10/08) motór ida soke vítima ida la’o ain iha área Merkadu Antigu Comoro  rezulta vítima ida lori too ospitál maka mate.

Kona-ba vítima sira ne’ebé sofre kanek todan no kanek kaman maioria hala’o hela tratamentu saúde iha Ospitál Nasionál Guido Valadares (HNGV), balun iha Manatuto, balun rekupera no fila ona ba uma.

Nia garante katak Komandu PNTL mós kontinua garante situasaun seguransa iha territóriu Timor-Leste lao kontroladu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here