Vítima Leonel Freitas, hala’o hela tratamentu intensivu iha Ospitál Referral Baucau. Imajen/Foti husi Facebook

DILI, 12 agostu 2020 (TATOLI)- Polísia Nasionál Timor-Leste (PNTL), liuhusi Komandu Polísia Munisípiu Baucau, daudaun ne’e, halo hela investigasaun ba autór deskoñesidu ne’ebé lori tudik sona vítima Leonel Freitas, iha nia kotuk laran  iha área Vila Nova, Suku Tirilolo, Munisípiu Baucau.

Portavós PNTL, Superintendente Xefe Arnaldo de Araújo. Imajen/dok.Tatoli

Kazu tentativa omisídiu ne’e, akontese iha tersa (11/09), purvolta tuku 15:00 Otl, bainhira vítima hamutuk ho nia kolega sira atu ba partisipa misa  iha Igreja Parókia Baucau Vila, derrepente ema deskoñesidu lori tudik sona kedas ba vítima nia kotuk laran rezulta raan sai maka’as.

Portavós Komandu Jerál PNTL, Superintendente Xefe Arnaldo Araújo informa, vítima daudaun ne’e halo ona tratamentu saúde iha ospitál Referral Baucau no suspeitu deskoñesidu ne’e PNTL kontinua buka tuir ninia paradeiru.

“Loos duni, horiseik mosu mós kazu tentativa omisídiu ne’e akontese iha Baucau Vila, oras ne’e daudaun ninia prosesu investigasaun sei la’o hela para buka tuir autór ne’e,’’ dehan portavós PNTL, Arnaldo de Araújo, ohin, ba jornalista liuhusi konferénsia imprensa iha  Kuartél Jerál PNTL, Caicoli-Dili.

PNTL Baucau dezde horiseik too ohin haruka ona ekipa Servisu Informasaun Polsiia (SIP) no Ofisiál Polísia Suku (OPS) no autoridade Baucau rekolla ona informasaun para kaptura suspeitu.

“Ita hein katak bainhira vítima rekupera sei fó nian deklarasaun ne’ebé mak loos, atu nune’e polísia bele kaer lalais suspeitu ne’e,” nia esplika.

Kona-ba motivu husi kazu ne’e, portavós PNTL lakohi esplika envolve grupu organizasaun arte marsiál ou lae, tanba prosesu investigasaun seidauk remata.

“Ha’u labele ko’alia uluk lai, ita hein kaer uluk suspeitu ba mak ita foin bele hatene nia mai husi grupu ida ne’ebé,’’  dehan  eis Komandante PNTL Oe-Cusse ne’e.

Iha parte seluk, Agência Tatoli tenta konfirma kazu ne’e ba Komandante PNTL Munisípiu Baucau, Superintendente Xefe, Armando Monteiro, seidauk bele fó esplikasaun, tanba parte PNTL sei halo hela prosesu investigasaun.

Situasaun seguransa iha Munisípiu Baucau daudaun ne’e kontinua la’o kontroladu no parte PNTL halo seguransa másimu ba misa boot ida iha Igreja Parókia Santo António Baucau nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here