Prezidente Conselho de Imprensa (CI), Virgílio da Silva Guterres.Imajen/Joanico Araújo.

DILI, 12 agostu 2020 (TATOLI)–Prezidente Conselho de Imprensa (CI), Virgílio da Silva Guterres, hateten tuir lei Komunikasaun Sosiál (KS) órgaun Komunikasaun Sosiál tenke rejista iha Conselho de Imprensa la’ós hanesan lisensa ba atividade jornalistika maibé hanesan mekanizmu adminstrativu ida hodi fasilita CI no fasilita públiku nia partisipasaun ba ezisténsia kada mídia ida-nian.

Hahú hosi 2016-2020, Virgilio Giterres haktuir, Conselho de Imprensa konsege rejistu ona órgaun komunikasaun sosiál besik 30-resin inklui ho online sira bazea ba verifikasaun ikus ne’ebé Conselho Imprensa halo iha fulan jullu nia-rohan.

“Conselho de Imprensa konsege rejistu ona órgaun komunikasaun sosiál iha Timor-Leste besik 30-resin. Hosi 30-resin ne’e, sira-ne’ebé mak kontinua eziste no regularmente halo publikasaun hanesan órgaun komunikasaun sosiál mak hamutuk 24. Ami hatene katak iha órgaun komunikasaun sosial balu ne’ebé mak seidauk rejista ka rejista ona maibé tenke presiza kompleta rekezitu balun no ami sei hein hela sira atu mai rejista,” dehan Prezidente Konsellu Imprensa (CI), Virgílio da Silva Guterres, ba Agência TATOLI iha nia knaar fatin, Kinta-boot, Dili, tersa ne’e.

Virgilio Guterres hateten, Lei Komunikasaun Sosiál mak fó tan kompeténsia atu Conselho de Imprensa uza nia kompeténsia hodi bele halo monitorizasuan no halo akompañamentu ba sira-nia konteudu jornalístiku maibé agora ne’e Conselho de Imprensa nia mandatu mak to’o rejista ne’e de’it.

Órgaun Komisaun Sosiál sira ne’ebé mak seidauk kompleta rekezitu, nia haktuir, barak liu mai hosi mídia eletróniku liuliu rádiu komunidade sira, maibé iha mídia rua ka tolu mak rejistu ona maibé seidauk kompleta sira-nia dokumentu.

Tuir nia, hahú hosi CI harii iha Timor-Leste iha 2016 no tuir mandatu bazea ba lei mak buka meiu hodi rejista órgaun Komunikasaun Sosiál (KS) sira ne’ebé mak iha kategoria rua (2) hanesan kategoria públiku konvensionál ne’e katak rádiu, jornál, televizaun ne’ebé eziste ho objetivu atu fahe duni informasaun ba públiku ne’ebé baibain bolu mainstream.

Depois, nia hatutan, iha kategoria seluk mak órgaun Komunikasaun Ssosiál mak naun lukrutivu no dotrinadu mak hanesan rádiu ho televizsaun sira ne’ebé mak halo ba konviksaun relijiozu ka partidu polítiku sira maibé ninia konteudu ne’e ko’alia kona-ba programa relijiaun kultura nian ka atividade polítika partidu sira-nian.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here