Laboratóriu: Imajen: Nelia Fernandes

DILI, 11 agostu 2020 (TATOLI)-Diretór Ezekutivu Interinu Laboratóriu Nasionál, Liborio da Costa Alves, informa nia parte sei uza mákina polymerase chain reaction (PCR) manual hodi halo teste ba pasiente no suspeitu COVID-19.

Daudaun ne’e, Laboratóriu Nasionál iha mákina PCR manual hamutuk tolu, mákina ida apoiu husi Organizasaun Mundiál Saúde (OMS), ida husi Organizasaun Menzies no ida Governu maka sosa.

”Rezultadu sira ne’ebé mak Laboratóriu Nasionál atu fó sai ne’e to’o loron rua mak fó sai tanba uza makina PCR ekstraksi  manual ida deit  hodi  halo rahun tiha  virus ne’e han tempu oras tolu ka haat nia laran entaun ita labele fó sai loron ne’ebé mak hanesan exemplu loron ida amostra 50 ekstraksi  ita labele fó sai agora tanba kle’ur entaun hein loron rua mak fó sai rezultadu,”  informa nia ba Tatoli via telefone, tersa ne’e.

Husi mákina hamutuk tolu ne’e, mákina ida a’at ona no sei falta rua maka sei di’ak hodi fasilita espesialista sira para halo teste ba suspeitu coronavirus.

“Agora dadaun  hein ita-nia Governu sosa liuhusi UNDP ne’ebe  mak sei iha dalan no hein tan ita-nia parseiru hanesan Organizasaun Mundiál Saúde atu sosa foun ba ita atu uza hodi teste ba amostra sira ne’e,” tenik tan.

Tuir dadus husi Laboratóriu Nasionál durante fulan lima nia laran konsege halo ona teste ba suspeitu coronavirus hamutuk ema 4.502, mane 2.520 no feto 1.982.

”Agora daudaun rezultadu ne’ebé  seidauk fó sai mak hamutuk 19,’’ nia hateten.

Maski nune’e Diretór Ezekutivu Laboratóriu Nasionál ne’e hateten mákina rua ne’e sei sufisiente atu halo servisu.

Jornalista : Felicidade Ximenes  

Editór       : Agapito dos Santos

HAKEREK NO HATÁN

Please enter your comment!
Please enter your name here