Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (12/08). Imajen Tatoli/Egas Cristovão

DILI, 12 agostu 2020 (TATOLI)-Governu liuhosi desizaun Konsellu Ministru (KM) aprova ona projetu Dekretu-Lei, kona-ba kria subsídiu ida ba ema sira ne’ebé hala’o atividade jornalístika iha Sala Situasaun, Sentru Integradu ba Jestaun Krize (CIGC, sigla portugés).

Projetu Dekretu-Lei ne’e aprezenta hosi Ministru Finansa (MF), Fernando Hanjam no Ministru Asuntu Parlamentár no Komunikasaun Sosiál (MAPKOMS), Francisco Martins da Costa Jerónimo.

Ministru Prezidénsia Konsellu Ministru, Fidelis Manuel Leite Magalhães, hateten ema hirak ne’e maka durante ne’e asume knaar iha vijénsia Estadu Emerjénsia ne’ebé deklara ona husi Dekretu Prezidente Repúblika númeru 29/2020, loron 27 marsu, no númeru 32/2020, loron 27 abríl, iha kondisaun direta ba surtu COVID-19.

“Profisionál sira ne’e dezempeña sira-nia funsaun ho forma ezemplár, hodi kontribui ho desizivu ba difuzaun informasaun ne’ebé kredível kona-ba prevensaun no kontrolu moras iha territóriu nasionál, hodi mitiga reseiu populasaun no hodi prevene pániku jeneralizadu, saida maka ultrapasa ona ho devér profisionál ne’ebé simples, hodi serví manifestamente interese públiku ne’ebé superiór kona-ba transmisaun informasaun ne’ebé lais,” hateten Ministru Fidelis, hafoin ramata reuniaun KM iha Palásiu Governu, kuarta ne’e.

Governante ne’e konsidera, jornalista sira hala’o atividade jurnalístika durante situasaun krize surtu COVID-19 hodi nafatin disemina informasaun, tanba ne’e importante tebes atu inklui iha despaisu MAPKOMS no sira nia-naran ne’e verifikadu hosi CIGC.

“Kualifika atu evita hirak ne’ebé maka la hola parte iha liña frente, maski jornalista la kualifika, kualifika maka sira ne’ebé servisu iha liña frente no hetan sertifikasaun husi CIGC ida ne’e konfirma ho MAPKOMS mak sei aprezenta ho despaisu ida ho naran ne’ebé verifika tiha ona,” nia akresenta.

Dekretu-Lei ne’e Governu finaliza tiha redasaun finál haruka ba Prezidente Repúblika, Francisco Guterres ‘Lú Olo’ hodi hetan promulgasaun.

Fidelis dehan, tanba proposta kona-ba komunikasaun sosiál nian ne’e laiha alterasaun katak la presiza halo fali alterasaun barak, hafoin halo aprovasaun entaun iha tempu badak finaliza hodi halo desizaun.

Jornalista; Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here