Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (12/08). Imajen Tatoli/Egas Cristovão

DILI, 12 agostu 2020 (TATOLI)-Ministru Finansa, Fernando Hanjam, aprezenta alterasaun dahuluk ba Dekretu-Lei númeru 17/2020, loron 30 abríl, ne’ebé kria suplementu remuneratóriu ba funsionáriu, ajente no traballadór sira administrasaun públika nian, ne’ebé asume knaar iha Sala Situasaun, Sentru Integradu Jestaun Krize (CIGC, sigla portugés) durante luta kontra surtu COVID-19.

Ministru Prezidénsia Konsellu Ministru, Fidelis Manuel Leite Magalhães, hateten diploma ne’ebé hetan aprovasaun iha Konsellu Ministru (KM) ne’e, mensiona katak ajente no traballadór administrasaun públika ne’ebé sei hetan remunerasaun maka ba sira ne’ebé presta atividade profisionál ida-idak iha servisu ba prevensaun no kontrolu COVID-19, iha kondisaun direta ba surtu COVID-19 durante vijénsia Estadu Emerjénsia.

“Alterasaun ne’e abranje suplementu remuneratóriu ba pesoál ne’ebé hala’o funsaun iha Sala Situasaun no pesoál hosi Servisu Nasionál Intelijénsia, hatuur atividade ne’ebé envolve risku infesaun surtu COVID-19 no task force ba prevensaun no kontrolu COVID-19, hosi administrasaun munisípiu sira,” relata Ministru Fidelis hafoin ramata reuniaun KM iha Palásiu Governu, kuarta ne’e.

Dekretu-Lei ne’e, Governu finaliza ona ninia redasaun finál no haruka ona ba Prezidente Repúblika (PR), Francisco Guterres ‘Lú Olo’ hodi hetan promulgasaun.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here