SERVE,IP. Imajen/Espesiál

DILI, 10 agostu 2020 (TATOLI)-Servisu Rejistrasaun no Verifikasaun Emprezariál, Institutu Públiku (SERVE,IP), ohin simu ona pedidu rejistu emprezariál liuhosi email atu asegura no kontribui ba realizasaun polítika Governu hodi hasa’e kualidade no prestasaun servisu ba atendimentu ba públiku no elimina kustu no tempu.

Tuir nota impresa ne’ebé Agência Tatoli asesu, SERVE informa ba públiku, liuliu ba komunidade emprezariál hotu katak hahú husi loron 10 agostu 2020, servisu rejistrasaun ne’e sei simu pedidu liuhosi email ba prosesu pre-verifikasaun.

Prosesu ne’e, hanesan dalan ida hodi fasilita no permite prosesu rejistu komersiál ho forma eletróniku ne’ebé mak dezigna hosi SERVE, tuir instalasaun instituisaun ne’e iha Díli no munisípiu sira.

Prosesu ne’e sei hahú husi faze dahuluk, halo prosesu pre-verifikasaun ba naran komersiál atu partisipa iha negósiu no empreza sira sei tuir regra no prosedimentu aplikável.

Daruak,  bainhira pre-verifikasaun loos ona, SERVE sei informa fali ninia rezultadu, datoluk, aplikante sira presiza prepara dokumentu sira hanesan estatutu no konstitutivu sira, inklui dokumentu seluk hanesan akta deliberasaun, deklarasaun ruma no dokumentu sira seluk atubele submete hikas tuir email.

Ikus liu, SERVE sei halo prosesamentu ba aplikante nia dokumentu tuir pedidu ka nesesidade sira.

Lista email dezignada ba prosesu pre-verifikasaun. Imajen/SERVE

Prosesu pre-verifikasaun aplikável ba prosesu sira hanesan rejistu foun, alterasaun, renovasaun, taka empreza ka kompañia, disolusaun, elimina, suspende ezersísiu ka hala’o atividade ekonómika sira.

Servisu rejistrasaun ne’e mós eziste ona  númeru ba liña direta (hotline number) hanesan númeru própriu ida ne’ebé dezigna hodi simu no responde kualkér pedidu ka informasaun (+670) 781222223.

Pagamentu ba emolumentu sira iha SERVE, iha Díli liuhosi akordu kooperasaun ho Banku Nasionál Komérsiu Timor-Leste (BNCTL, sigla portugés) ne’ebé sei instala espasu ba atendimentu ho kaixa ba konta própria ida iha eskritóriu SERVE iha Dili, nune’e bele fasilita no permite kliente sira hotu bele selu pagamentu ba emolumentu sira iha fatin no tempu hanesan, bainhira presiza ba kualkér nesesidade iha ámbitu rejistu komersiál nian.

“Ami agradese ba ita bo’ot sira hotu nia atensaun no kooperasaun tomak hodi bele halo tuir ka implementa jestaun foun ida ne’e husi ohin ba oin no ami enkoraja ita bo’ot sira hotu, atubele uza email sira ne’ebé mak dezigna ona, hodi nune’e bele fasilita di’ak ita bo’ot sira hotu no sei sai dalan ida efisiente no efetivu liu hodi hamenus tempu, kustu no enerjia, inklui bele alkansa ita bo’ot sira nia dezeju hotu hodi konsege rejista no opera negósiu tuir saida mak lei sira hateten,” refere nota empresa hosi SERVE.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here