Númeru Defensór Públiku seidauk sufisiente
DILI, 10 agostu 2020 (TATOLI)-Defensór Públiku Jerál, Câncio Xavier, informa, daudaun ne’e númeru Defensór Públiku seidauk sufisiente hodi atende prosesu sira tanba ne’e presiza aumenta.
Notísia Relevante : Defensoria Públika sei loke edifísiu reprezentasaun iha munisípiu lima
Antes ne’e, Defensór Públiku hamutuk na’in-36, husi númeru ne’e ho nia kompozisaun na’in-tolu mak assume kargu hanesan Defensor Públiku Jerál, Defensor Inspektór, Defensor Adjuntu, no Defensor Sergio Hornai ba fali assume kargu Komisáriu Anti-Korrupsaun, inklui na’in -ida mak mate ona.
Portantu númeru efetivu Defensór titular ne’ebé kaer prosesu daudaun na’in-31, ne’ebé iha Munisípiu Dili na’in-19, Suai (5), Baucau (7) no Oe-cusse na’in-rua (2).
“Númeru ne’e la sufisiente, presiza aumenta tanba tuir jeográfika populasaun uitoan maibé populasaun na’in-ida bele halo krime rua ka tolu,” hateten Defensór Públiku Jerál, Câncio Xavier ba Agência Tatoli, iha nia kna’ar fatin, Maskarinhas, Dili.
Atu responde ba nesesidade autór judisiál ne’ebé sei menus rekursu maka Governu liuhusi Ministériu Justisa (MJ) tau ona planu hodi prevee iha orsamentu jerál Estadu tinan 2020 bainhira aprova ona sei loke bolsu estudu ba timoroan lisensiadu iha area direitu, nune’e 2021 bele hahú tuir kursu sai juiz, prokuradór no defensór públiku.
Númeru vaga kandidatura ema nain-15 ba juis, na’in-15 ba prokuradór no na’in-15 defensór públiku ne’ebé sei tuir iha Sentru Formasaun Jurídika no Judisiál (CFJJ-sigla portugés).
Jornalista : Nelson de Sousa
Editór : Francisco Simões
