Imajen/Foti hosi facebook: Martinho G S Gusmão

DILI, 08 agostu 2020 (TATOLI)—Padre Martinho Gusmão no Avelino Coelho diferensa ideia kona-ba fundadór estadu ba Repúblika Demokrátiku Timor-Leste (RDTL) ho argumenta diferensa. 

Perspetiva akadémika ne’e akontese bainhira akadémiku na’in-rua ne’e sai oradór ba semináriu nasionál ne’ebé organiza hosi Universidade da Paz (UNPAZ) ho tema “Movimentu Patriotizmu Konstitusionál: Konsiénsia Krítika ba Nasaun”.

Oradór Padre Martinho Gusmão iha nia perspetiva konsidera Nicolau Lobato no Xanana Gusmão Mak Fundadór Estadu. 

Nia argumenta, ko’alia barak ema hotu bele ko’alia maibé atividade lee ne’e ema bele lee hotu mós la kompende maibé kapasidade atu halo sínteze ema uitoan de’it. Tuir nia, fundador ba estadu ne’e tenke fila espiritu nasaun no tenke prenxe kriteria.

“Tanba ne’e mak ha’u dehan ita tenke fila ba espíritu ba nasaun. Bainhira ita ko’alia kona-ba fundadór ba estadu, fundadór ba nasaun tenke ser iha kritéria tolu (3). Primeiru, movimentu intelektuál, movimentu krítiku no ikus liu movimentu militár,” dehan Padre Martinho Gusmão iha semináriu ne’ebé hala’o iha UNPAZ, sábadu ne’e.

Amo Martinho hatutan, bainhira kritéria tolu (3) ne’e tau ba ema ida entaun ema ne’e o mak fundadór, se ida de’it lae. Nia dehan, hotu-hotu bele lutadór maibé la’ós hotu-hotu fundadór hanesan mós Igreja Katóliku, no la’ós ema hotu-hotu bele harii partidu polítiku maibé ema hotu-hotu bele halo polítiku. 

Nia fundamenta, patriotizmu konstitusionál aumezmu tempu medida konsiénsia no aumezmu aumezmu tempu medida krítika. Iha filozofia krítika ne’e ba ema sira-ne’ebé iha kapasidade intelektuál, krítika ho razaun puru, krítika ho razaun prátika no krítika ho razaun jurídiku.

“Tanba ne’e, ha’u hakerek livru kona-ba Nicolau Lobato, ha’u dehan luar biasa sabemos, podemos no devemos,” Amo Martinho hateten. 

Nia haktuir, Nicolau Lobato ninia liafuan “korajen, abnesaun no orgullu” no ho kategória tolu ne’e mak orienta povu tomak hadomi pátria.

Entretantu, Oradór Avelino Coelho la konkorda ho artigu barak ne’ebé Padre Martinho Gusmão hakerek ne’ebé temi fundadór estadu no nasaun.

“Amu Martinho bele la konkorda  ho ha’u, nasaun ema ida ba funda. Se ha’u Mambae, se ha’u Makasa’e ka Tokodede, laiha ema ida funda estadu. Laiha konseitu ema ida funda konseitu Mambae, Makasa’e ka Tokodede. Eziste nanis ona tanba siénsia ne’e mosu kebenaran apa adanya,” dehan Avelino Coelho iha semináriu nasionál ne’e.

Nia esplika, nasaun por definisaun ema ne’ebé moris hamutuk iha fatin ida ho tradisaun ne’ebé mak hanesan, kultura ne’ebé mak hanesan no ko’alia lian ne’ebé mak hanesan liuhosi pontu devista konseitu antropolójiku, sosiál no kulturál ne’e laiha ema ida funda nasaun.

“Ha’u la konkorda balun dehan ha’u mak fundadór nasaun, lae no laiha. Fundadór movimentu ba libertasaun yes, kebetulan imi funda, ami ne’e elementu tanba bainhira povu ida manán konsiénsia hanesan Sukarno dehan nune’e Riwayat hidup yang sama karena di tindas maka lahirlah perasaan kebangsaan. Tanba ne’e, ita-nia nasionalizmu 1974-1975 ne’e nasionalizmu polítiku, antí kolonialista no antí imperialista, iha 1975 dehan independénsia totál no kompleta,” nia dehan. 

Nia dehan presiza define identidade nasionál entre Timor ho Portugál ne’e iha-ne’ebé, direfensa Timor ho Austrália ne’e iha-ne’ebé no diferensa Timor ho Indonézia ne’e iha-ne’ebé.

“Ha’u ne’e jerasaun hosi Gari (marda-lian indonézia). Tan ne’e mak ha’u la konkorda dehan balu mak fundadór ba nasaun, fundadór movimentu ba libertasaun ha’u hasa’e xapeu, ha’u-nia knua ne’e Maulua,” dehan Eis Sekretáriu Estadu iha IV Governu Konstitusionál ne’e.

Iha semináriu nasionál ne’ebé organiza hosi Universidade da Paz (UNPAZ) ho tema “Movimentu Patriotizmu Konstitusionál: Konsiénsia Krítika ba Nasaun” ne’e Padre Domingos Maubere no Dosente Fernando Dias Gusmão mós sai orador.

Partisipante sira ne’ebé partisipa iha ne’e kuazu ema 800-resin kompostu hosi estudante sira hosi universidade sira iha Dili, dosente sira, sosiedade sivíl no estudante hosi UNPAZ.

Jornalista : Evaristo Soares Martins

Editór        :  Cancio Ximenes

   

1 KOMENTÁRIU

  1. Koalia Fundador ho Nasionalisme. Se ita koalia Funcador Nasaun, Hau hanoin ita la ble konta. Ka sura deit husi 1975 mai too 1999. Tamba ita persisa konta mos rai sira nbe kita kontra kolonializasaun Portuguese, tamba sira hahu funu kontra kolonialisme hodi depende povu nia direito liberdade. Serake Liu Rai sira nee, ita hateten Fundador ka Oinsa?
    Nasionalisme, katak ema nbe depende identidade no sobrania povu no Nasaun nian. Serake ita uja lingua portugis sai lian official no obriga sidadaun Timorense tenke aprende no servisu birokrasia tenke uja lian portugis, duke tetun?
    Obrigado e abracos…!

HAKEREK NO HATÁN

Please enter your comment!
Please enter your name here