Ministru Turizmu, Komérsiu no Indústria, José Lucas do Carmo da Silva, dada-lia ho grupu ortikultura sira no autoridade lokál Postu Administrativu Maubisse, Munisípiu Ainaro durante vizita, sesta (07/08). Imajen/Antónia Gusmão

MAUBISSE, 07 agusto 2020 (TATOLI)-Ministru Turizmu, Komérsiu no Indústria (MTKI), José Lucas do Carmo da Silva, hamutuk ho ekipa vizita grupu órtikultura iha Postu Administrativu Maubisse, Munisípiu Ainaro.

Vizita ne’e ho objetivu atu haree besik liután grupu agrikultór sira no rona sira-nia difikuldade hodi parte rua bele tau hanoin hamutuk hodi buka solusaun.

Durante vizita, Ministru José Lucas nota katak grupu sira iha ona vontade di’ak hodi kria rasik empregu hodi sustenta ekonomia família, maibé durante ne’e sira hasoru problema iha merkadoria, ne’ebé susar tebes atu lori sira-nia produtu sira ba merkadu.

“Ha’u vizita fatin ortikultura iha Maubisse, mai haree komunidade sira prodúz modo ne’ebé fornese ba sosiedade hodi lori ba Dili, ha’u rona hosi komunidade sira katak iha ámbitu surtu COVID-19 iha Timór sira halo produsaun nafatin, maibé lori produtu ba merkadu,” relata Ministru hafoin vizita grupu ortikultura Maubisse, sesta ne’e.

Aleinde ne’e, grupu ortikutura sira tau produtu balun iha loja maibé sira iha kompetisaun, bainhira to’o tarde loja sira simu uluk husi fatin balun.

Governante ne’e dehan, papel MTKI maka atu koordena ho sosa-nain iha Dili laran, liuliu loja sira ho povu agrikultór sira atu iha mekanizmu merkadu di’ak ne’ebé bele fasilita malu.

Kona-ba loja agrikultura rua iha Dili, Ministru ne’e rekoñese loja rua de’it labele akomoda produtu agrikultór hosi munisípiu hotu, tanba ne’e MTKI sei esforu hodi koordena ho loja sira bele sosa agrikultór nia produtu.

Agrikultór husu MTKI fasilita merkadu ba produtu

Iha sorin seluk, Agrikultór Maubisse, Manuel Mendonça, apresia vizita MTKI ne’ebé fó hakat to’o ninia fatin no husu Governu bele fasilita merkadu ba sira-nia produtu.

“Kontente tebes tanba iha líder ida bele tama ha’u-nia fatin. Hosi prezensa Ministru, ha’u bele hato’o difikuldade durante ne’e atu buka merkadu ba ami-nia produtu sira. Ha’u-nia produtu maka morangu, durante ne’e loja sira mai sosa maibé oituan de’it entaun barak maka estraga, tanba ne’e ami triste tebes,” nia haktuir.

Agrikultór ne’e husu ba MTKI hodi bele apoia ekipamentu ba sira, nune’e produtu ne’ebé ema la sosa bele prodúz fali buat seluk hanesan hosi morangu sai fali marmelada ka tua.

Vizita MTKI ba grupu ortikultura iha Aileu

Nune’e mós, agrikultór modo iha Aldeia Lekitura, Suku Lekitura, Postu Administrativu Aileu Vila, Munisípiu Aileu, hato’o preokupasaun tanba durante ne’e prodúz modo barak maibé ema ladún sosa no iha ámbitu Estadu Emerjénsia ligadu ho surtu COVID-19 iha Timor-Leste, loja k’manek ne’ebé mak antes ne’e iha ona akordu ho grupu ortikultura sira sosa oituan de’it.

Ministru Turizmu, Komérsiu no Indústria, José Lucas do Carmo da Silva, dada-lia ho grupu agrikultór sira iha Suku Likitura, Postu Administrativu Aileu Villa, Munisípiu Aileu, sesta (07/08). Imagén Tatoli/Antónia Gusmão

Agrikultór Feliciano Salsinha Almeida, husu ba MTKI hodi bele solusiona preokupasaun ne’ebé sira hato’o.

“Agradese tebes ba prezensa Ministru, tanba ho prezensa ne’e bele buka dalan hodi koordena ho loja sira bele mai sosa ami-nia produtu. Ami mós husu ba Ministru kuandu mai haree ona labele husik de’it maibé buka meiu hodi rezolve ami-nia preokupasaun sira,” nia fó hanoin.

Supermerkadu k’manek maka durante ne’e selebra akordu ho grupu agrikultór modo sira hodi sosa produtu, maibé iha tempu Estadu Emerjénsia ladún sosa no halo modo barak maka a’at.

Vizita dahuluk ne’ebé mak Ministru José Lucas ho ekipa hala’o ba maka iha Maubise inklui Aldeia Urahou no Ululefa.

Grupu ortikultura sira ne’e kuda morangu, modo tahan, repollu, tomate, alfase, kuli flower, no seluk tán, ne’ebé mak kuda iha rai hamutuk ektare haat.

Iha Suku Likitura, Postu Administrativu Aileu, MTKI ho ekipa vizita grupu agrikultór sira ne’ebé mak kuda modo hanesan modo mutin, senoura, repollu no seluk tán.

Iha vizita ne’e akompaña mós husi autoridade lokal postu administrativu rua.

Jornalista: Antónia Gusmão

Editora: Julia Chatarina

  

HAKEREK NO HATÁN

Please enter your comment!
Please enter your name here