Prezidente Autoridade Nasionál Petróleu no Minerál (ANPM) sesante, Gualdino do Carmo da Silva, halo hand over ba Prezidente ANPM foun, Florentino Mateus Soares Ferreira, iha edifísiu Ministériu Finansa, sesta (07/08). Imajen/ANPM

DILI, 07 agostu 2020 (TATOLI)-Hafoin ramata mandatu iha 30 juñu 2020, Prezidente Autoridade Nasionál Petróleu no Minerál (ANPM) sesante, Gualdino do Carmo da Silva, entrega serbisu ba Prezidente ANPM foun, Florentino Mateus Soares Ferreira, hodi lidera instituisaun importante Timor-Leste ne’e.

Florentino hetan nomesaun liuhosi deliberasaun Konsellu Ministru iha loron 29 jullu hodi troka Gualdino ne’ebé lidera ona ANPM durante tinan-13 nia laran.

Prezidente ANPM sesante husu lideransa foun instituisaun ne’e hodi kontinua serbisu peskiza rikusion Timór iha rai-maran no tasi-laran, ne’ebé tinan kotuk loke ona konkursu públiku ba peskiza esplorasaun petróleu.

“Troka posizaun ne’e normál tanba ita hotu serbisu ba nasaun, maibé projetu no kontratu sira tenke kontinua. Iha projetu rua ka tolu ne’ebé maka la’o hela hanesan konkursu publiku ne’ebé ita loke ona iha jullu tinan kotuk no konkursu ne’e sei la’o hela,” tenik Gualdinho iha edifísiu Ministériu Finansa, Aitarak-Laran, sesta ne’e.

Iha relatóriu ne’ebe entrega ba atuál Prezidente ANPM iha planu programa no orsamentu inklui prioridade órgaun reguladór ne’e durante tinan lima, tanba ne’e Gualdino husu atu iha polítika rasik ba instituisaun.

“Hanesan institusaun autónomu tenke iha polítika rasik kona-ba dezenvolve instituisaun, maski iha buat barak maibé kestaun hanesan rekursu umanu, sistema, polítika institusionál presiza atu administra atubele hadi’a funsionamentu instituisaun,” nia akresenta.

Foin daudaun ANPM halo estensaun submisaun konkursu públiku, tanba konsidera importante atu nasaun sira hatene katak Timór loke konkursu peskiza ba esplorasaun petróleu.

“Ita iha peskiza rai-laran no iha tasi-laran, ita-nia dadus agora loke ona ba públiku hodi ema mundu tomak bele asesu informasaun, ba poténsia Timor-Leste. Ita iha meiu atu investór sira ne’ebé iha interese bele tuir konkursu liuhosi informasaun detallu no kontaktu ita-nia ema atubele hetan esplikasaun kle’an,” nia realsa.

Maski projetu peskiza ne’ebé ANPM halo tinan kotuk ho durasaun tinan ida, maibé tanba situasaun COVID-19 deside atu estende tan tinan-ida.

“Prezidente ANPM foun bele kontinua ida-ne’e tanba ema iha nasaun barak hahú hatene Timór ninia rikusoin liuhosi peskiza, ida-ne’e sinál di’ak,” nia akresenta.

Asuntu seluk kona-ba petróleu, Prezidente sesante husu tau konsiderasaun ba projetu Bayu-Undan.

“Projetu Bayu-Undan hanesan projetu boot, maski iha rohan ona ein termu durasaun maibé serbisu la’o nafatin. Iha buat barak maka presiza fó konsiderasaun, ohin ha’u hato’o ba Prezidente foun katak iha buat balun presiza desizaun imediata,” nia fó hanoin.

Nune’e mós ba projetu kampu Greater Sunrise, ANPM iha papél importante.

“Iha finalizasaun rejime legál kontratuál ba projeitu Greater Sunrise, negosiasaun ho Austrália iha dalan klaran,” nia subliña.

Enkuantu iha parte minerál maka importante atu iha Lei Kódigu Mineiru ne’ebé foin lalais Parlamentu Nasionál aprova ona iha jeneralidade.

“ANPM iha papél importante, hahú hosi ninia preparasaun hotu ba esbosu to’o submete ba Parlamentu Nasionál. Haksolok tebes haree nai-ulun sira bele aprova iha jeneralidade, hein molok tinan ne’e nia rohan bele aprova Lei Kódigu Mineiru, nune’e ita-nia indústria minerál bele la’o,” nia dehan.

Prezidente ANPM foun konsidera rekomendasaun Prezidente sesante

Iha fatin hanesan, Prezidente ANPM, Florentino Mateus Soares Ferreira, hateten nia parte sei konsidera rekomendasaun hosi Prezidente ANPM sesante.

“ANPM hanesan instutuisaun públiku ne’ebé maka regula atividade petrolífeira no mós minarál iha territóriu rai-maran no tasi-laran, tanba ne’e atividade sira ne’e la’o daudaun maski iha mudansa lideransa labele iha implikasaun ruma ba kontinuasaun indústria sira ne’ebé maka opera hela iha ita-nia rai-laran,” nia subliña.

Florentino garante sei laiha interupsaun ba atividade sira ne’ebé la’o hela.

“Ita hotu iha komprimísiu boot tebes simu knaar ne’ebé investe hosi Konsellu Ministru. Ohin ami-nain rua Prezidente ANPM sesante halo trasferénsia podér hodi kontinua serbisu no asegura sustentabilidade atividade sira hodi bele la’o nafatin,” nia akresenta.

Tuir nia, petróleu sei prodúz nafatin inklui atividade minerál no estudu sira.

“Kontinuasaun sustentabilidade hosi atividade tomak ne’ebé maka Autoridade Petróleu no Minerál regula labele para maibé la’o hanesan atividade normál ne’ebé maka sai prioridade dahuluk no seluk maka polítika estratéjika seluk ita sei halo ajustamentu tuir nesesidade bainhira ita haree katak iha nesesidade ruma atu halo,” nia realsa.

Nune’e mós, Reprezentante Ministériu Petróleu no Minerál (ANPM), Amândio  Gusmão Soares, iha esperansa katak Prezidente ANPM foun bele lori órgaun  reguladór ne’e di’ak liután.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here