Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, kinta (06/08), Imajen Tatoli/Egas Cristovão

DILI, 06 agostu 2020 (TATOLI)-Iha reuniaun Konsellu Ministru (KM) estraordinária kinta ne’e, aprova dekretu Governu ne’ebé aprezenta hosi Primeiru-Ministru, Taur Matan Ruak, kona-ba medida ezekusaun ba deklarasaun Estadu Emerjénsia (EE), ne’ebé efetua hosi Dekretu Prezidente Repúblika númeru 55/2020 loron 05 agostu, hodi hatán ba pandemia COVID-19.

EE ba faze dahaat ne’e abranje teritóriu nasionál tomak no vigora iha tuku 00:00 loron 06 agostu to’o tuku 23:59 loron 04 setembru 2020.

“Estadu Emerjénsia ne’e nia abranje territóriu nasionál tomak, maibé ninian foku liu ba de’it fronteira atu fasilita kuarentena. Ne’e maka ninian foku prinsipál no entra em vigór iha tuku 00:00 loron 06 agostu,” tenik Ministru Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu iha Palásiu Governu, kinta ne’e.

Notísia Relevante: Mensajen PR konaba EE

Hafoin Timor-Leste livre kazu COVID-19 durante fulan-tolu nia laran, iha loron 03 agostu rejista tan kazu ativu foun ida hosi sidadaun Indonézia.

Timor-Leste rejista kazu pozitivu COVID-19 dahuluk iha 21 marsu 2020 no kazu ikus liu rejista iha 24 abríl ho totál konfirmadu na’in-24 no provável na’in-haat.

Iha loron 15 maiu, liuhosi Sala Situasaun, Sentru Integradu Jestaun Krize (CIGC, sigla portugés) deklara pasiente konfirmadu no provável rekuperadu hotu ona.

Obrigatoriamente sujeitu ba kontrolu saúde

Dekretu-Lei ne’e Governu determina katak ema hirak ne’ebé maka hakarak tama no sai hosi territóriu nasionál, obrigatoriamente sujeitu ba kontrolu saúde no tenke kumpre izolamentu profilátiku (kuarentena) durante mínima loron 14.

Impoen realizasaun teste ba ema sé de’it maka tama mai territóriu nasionál no aprezenta sintoma hanesan moris COVID-19 no iha kazu ne’ebé diagnóstika ona ba COVID-19, obrigatoriamente tama iha izolamentu terapéutiku.

Governante ne’e esplika, implementasaun EE dahaat ne’e nia intensaun maka atu impoen kuarentena obrigatóriu ba ema hotu ne’ebé maka tama mai territóriu nasionál no bainhira kumpre kuarentena durante loron 14 maka laiha sintoma ruma ka laiha moras ne’ebé hanesan sintoma COVID-19 maka bele sai.

“Iha loron 14 ne’e obrigatóriu profisionál saúde sira halo akompañamentu hodi haree kondisaun,” nia akresenta.

Hela iha konfinamentu obrigatóriu durante loron 14 to’o simu alta médika iha estabelesimentu saúde, iha uma rasik ka sentru izolamentu Estadu, ema ne’ebé infetadu ho SARS-CoV-2 ne’ebé tama iha territóriu nasionál maihosi rai-li’ur ka ne’ebé  hasoru vijilánsia husi autoridade saúde sira.

Nune’e mós, proibidu sa’e karreta, ró ka aviaun ba ema hirak ne’ebé maka moras ho sintoma hanesan temperatura isin sa’e to’o 37,5célsiu, mear, garganta moras, konstipasaun no susar dada is ka falta ar, ezetu iha kazu evakuasaun médika.

“Ezemplu ema ida moras ain tohar ka kanek maka halo nia isin-manas, no intensaun atu lori nia ba kura iha fatin seluk ne’e autoriza nia bele sa’e aviaun no bele ba hetan tratamentu, maibé preiza atestadu médiku no presiza kontrolu husi médiku sira no karik bele tenke sertifika,” Fidelis realsa.

Governu rejeita implementasaun EE dahaat hapara atividade hotu

Portavóz Governu ne’e klarifika preokupasaun públiku ne’ebé maka dehan durante implementasaun EE ba faze dahaat ne’e, karik atividade sira ne’ebé la’o hela bele para, ne’e la loos.

“Intensaun Estadu Emerjénsia, enkuantu situasaun ne’e evului hela hanesan ne’e, atividade sira ne’ebé maka oras ne’e la’o hela bele kontinua la’o, a não ser derepente ita rejista aumentu ba numeiru ema infetadu no ema ne’ebé ho sintoma, entaun Governu obrigadu tenke hola medida sira seluk ne’ebé maka forte liután hodi bele asegura katak moras ne’e la hadaet ba ema barak,” nia subliña.

Fidelis hatutan, enkuantu situasaun kontroladu hela maka sei foku liu maka ba fronteira no foku liu mós atu oinsá ema ne’ebé tama sai ne’e tenke liuhosi kuarantena.

Situasaun ameasa, Ministériu Interiór bele taka fronteira

Tuir Ministru Fidelis, iha medida EE dahaat ne’e, iha kazu ezesionál sira bainhira justifika tuir razaun saúde no siguransa populasaun nian sira, maka Ministru Interiór bele determina enseramentu temporáriu iha postu fronteira.

“Medida ne’ebé Governu hatur katak Ministériu Interiór bele taka fronteira bainhira iha situasaun ameasa. Ministru Interiór bele halo despasu ida hodi taka fronteira,” nia akresenta.

Durante períodu vijénsia EE, lisensa, autorizasaun no aktu administrativu inklui dokumentu sira hotu mantein válidu independentemente dekursu husi prazu validade rasik.

Fiskalizasaun kumprimentu dispozisaun ba diploma ne’e kompleta ona forsa no servisu seguransa no ekipa vijilánsia epidemiolójika no sanitária la fó dalan ba atu rezisténsia ativa no pasiva ba orden sira ne’ebé maihosi autoridade públika kompetente iha ezekusaun ba deklarasaun EE.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no Tama mai Timor-Leste liuhosi dalan fronteira terrestre no aeroportu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here