Xefe Ekipa Task Force Servisu Água no Saneamentu (SAS) ba Kombate COVID-19, Francisco Afonso. Imajen/Osória Marques.

DILI, 05 agostu 2020 (TATOLI)–Xefe Ekipa Task Force Servisu Água no Saneamentu (SAS) ba Kombate COVID-19, Francisco Afonso, hateten maneira prevensaun ba COVID-19 daudaun ne’e presiza reforsa mak monta tanke ka profil iha merkadu sira tanba iha dalan públiku sira-ne’e ema ladún uza ona no dala barak bee estraga de’it.

Nia hatutan, durante Estadu Emerjénsia to’o mai agora ne’e Governu monta ona tanke ka profil provizóriu bee nian hamutuk 40 iha Dili laran hodi ema hotu bele fase liman no loro-loron ense bee ba profil ne’e 50-60 litru maibe dalaruma bee estraga de’it. 

Tanba, nia dehan, dalabarak komunidade mak ladún kontribui ho di’ak ba asesu bee ne’ebé mak ekipa task force SAS ba kombate COVID-19 prepara ona iha dalan públiku no iha merkadu sira.

“Dalabarak komunidade mak ladún kontribui ho di’ak ba asesu bee ne’ebé mak ekipa task force SAS ba kombate COVID-19 prepara. Fasilidade hirak ne’ebé mak ita-nia ekipa task force monta ne’e komunidade sobu lakon hotu. Ita sente triste bainhira komunidade lakohi halo kontribuisaun ba ita-nia ekipamentu prevensaun nian ne’e. Hanesan iha merkadu Tasi-tolu nian profil ne’e la funsiona tanba profil kuak no torneira mós laiha ona inkui sabaun fase-liman,” dehan Xefe Ekipa Task Force Servisu Água no Saneamentu (SAS) ba Kombate COVID-19, Francisco Afonso, ba Agência TATOLI iha nia knaar fatin, Colmera, Dili, kuarta ne’e.  

Maski nune’e, nia hateten, ekipa task force SAS iha konsiénsia nafatin hodi ba hadi’a tanke no torneira hodi ense fali bee, nune’e komunidade be utiliza nafatin.

Nia hsktuir, komunidade seidauk iha konsiénsia hodi utiliza fasilidade prevensaun COVID-19 ne’ebé mak Estadu no Governu tau ona iha dalan públiku no merkadu sira-ne’e maibé komunidade sira buka atu estraga fali fasilidade hirak ne’e.  

“Husu ba komunidade ne’ebé mak uza bee ne’ebé mak Governu prepara ona karik, di’ak liu uza ho konsiénsia no kuidadu nune’e labele estraga tanba fasilidade ne’e hodi uza ba prevensaun COVID-19 nian,” nia hateten.

Tanba ne’e, nia dehan, agora daudaun ne’e ekipa task force SAS nian tau improtansia liu ba merkadu sira iha Dili laran hodi monta profil atu nune’e komunidade sira ne’ebe tama-sai merkadu hodi bele utiliza ba fase liman. 

“Loron-loron ita la’o hela hodi observa direta ba tanke-bee (profil) ne’ebé mak ekipa task force monta ona iha merkadu no dalan públiku hodi komunidade uza fase-liman. Tanke ita monta hotu ,hein ense bee ba tanke de’it,” nia dehan. 

Nia hateten, ekipa task force halo observasaun direta no importante liu mak tanke ka profil iha merkadu sira hanesan Merkadu Taibesi, Manleuana no Tasi-tolu tanba ema barak mak asesu ba merkadu ne’e, nune’e presiza mantein prevensaun. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here