Esplozaun ne’ebé akontese iha Portu Beirute, Líbanu, iha tersa (04/08). Imajen/Espesiál

DILI, 06 agostu 2020 (TATOLI)-Governu no Povu Timor-Leste manifesta solidaridade no aprezenta kondolénsia ba família no amigu vítima esplozaun ne’ebé akontese iha rejiaun Beirute, Líbano iha tersa (04/08).

Ministru Prezidénsia Konsellu Ministru no Portavóz VIII Governu Konstitusionál, Fidelis Manuel Leite Magalhães, manifesta solidaridade ba Governu no povu Líbanu, ne’ebé hetan efeitu hosi akontesimentu ne’e.

“Ami-nia sentimentu kle’an ba família ne’ebé lakon ema ne’ebé sira hadomi no ba sobrevivente sira. Timor-Leste solidáriu ba Governu no povu Líbanu iha momentu difísil no iha dezafíu ne’e,” dehan governante ne’e hanesan haktuir iha nota ofisiál ne’ebé Agência Tatoli asesu iha kinta ne’e.

Esplozaun ida akontese iha Portu Beirute no provoka laloran sísmika ne’ebé hanesan terramotu ho eskala richer 3,3 no halo materiál barak maka a’at iha sidade, ema na’in-100 resin maka mate, ema na’in-5.000 maka kanek inklui ema 300.000 maka lakon hela fatin.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here