Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, kinta (06/08), Imajen Tatoli/Egas Cristovão

DILI, 06 agostu 2020 (TATOLI)- Reuniaun Konsellu Ministru (KM) estraordinária iha kinta ne’e, aprova ona projetu rezolusaun Governu nian, ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães, relasiona ho kriasaun komisaun koordenadora no akompañamentu ba reforma institusionál sira hanesan reforma administrasaun públika, reforma jestaun finanseira públika, desentralizasaun administrativa, reforma administrativa, no reforma judisiária.

Ministru Prezidénsia Konsellu Ministru, Fidelis Manuel Leite Magalhães, reforma institusionál boot ne’e interligadu no iha objetivu komun atu hadi’a forma hanesan setór públiku ne’ebé jere no funsiona ona no asegura katak Estadu hala’o kuadru legál no seguransa jurídika efetiva no maneira ne’ebé efisiente no efikaz liu.

“Komisaun  sira ne’ebé eziste ba reforma  institusionál Estadu nian, agora mekanizmu koordenasaun hanaran komisaun akompañamentu ba reforma sira,” tenik Ministru Fidelis, hafoin reuniaun KM iha Palásiu Governu, kinta ne’e.

Kriasaun komisaun koordenadora sei responsável estabelese diresaun no vizaun jerál reforma ka programa nian, koordena dezeñu, programasaun no implementasaun konsistente reforma ne’e, atu promove sinerjia no kooperasaun entre reforma sira, halakon obstákulu no sobre pozisaun entre reforma sira, fornese apoiu polítiku ba reforma sira no garante dezempeñu no implementasaun oportuna reforma ho di’ak.

Governante ne’e esplika, komisaun ne’e lideradu hosi Primeiru Ministru, koadjuva husi Ministru Prezidénsia Konsellu Ministru no integrada hosi ministru ne’ebé responsável ba orientasaun implementasaun kada reforma hanesan Ministru Finansa, Ministru Justisa no Ministru Administrasaun Estatál.

Tanba medida hirak ne’e interligada no partilla objetivu komún ida, presiza atu koordena iha nível ne’ebé a’as liu ba ninia dezenvolvimentu, implementasaun no monitorizasaun, liu-liu ho kriasaun komisaun koordenadora ida ne’ebé funsiona hanesan órgaun xapeu ba koordenasaun kona-ba reforma oin-oin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here