Ilustrasaun Reforma Fiskál. Imajen/Espesiál

DILI, 06 agostu 2020 (TATOLI)-Ministru Prezidénsia Konsellu Ministru, Fidelis Manuel Leite Magalhães, aprezenta projetu rezolusaun Governu no ikus mai hetan aprovasaun hosi Konsellu Ministru (KM) ba alterasaun rezolusaun Governu númeru 18/2019, loron 8 maiu, kona-ba komisaun interministeriál ba reforma fiskál no jestaun finansas públika.

Nune’e mós, rezolusaun Governu númeru 7/2019, loron 6 fevereiru, kona-ba komisaun interministeriál ba koordenasaun no ba reforma jestaun patromóniu Estadu.

Ministru Fidelis esplika, ho alterasaun ne’e Primeiru-Ministru, Taur Matan Ruak, ne’ebé antes ne’e prezide komisaun ne’e husik hela ninia funsaun hodi permite konsentra iha koordenasaun globál ba reforma institusionál sira liuhosi prezidénsia komisaun koordenasaun no akompañamentu ba reforma institusionál sira.

Tanba ne’e, komisaun setoriál ne’e pasa no sei lidera husi ministru responsável sira ba área ne’e.

“Primeiru-Ministru sai hosi komisaun ne’e no ba fali komisaun ida atu koordena, la’ós implementasaun ba matéria jestaun finanseira hamutuk no komisaun ba Estadu ninian propriadade movel ho imovél. Ba reforma fiskál no jestaun finansa públika inlui reforma jestaun patrimóniu Estadu, ninian implementasaun maka komisaun sira ne’e ba fali iha Ministériu Finansa atu haree,” dehan governante ne’e hafoin reuniaun KM estraordinária, iha Palásiu Governu, kinta ne’e.

Antes ne’e, iha komisaun ida maka tau-matan mós ba jestaun patrimóniu Estadu nian, hanesan ba uma no karreta Estadu sira.

“Agora koordenasaun ba fali Ministériu Finansa, ho apoiu hosi Ministériu Justisa no ministériu seluk tan maka hola parte iha komisaun ne’e,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here