Parlamentu Nasional. Imajen Tatoli/Egas Cristovão

DILI, 05 agostu 2020 (TATOLI)—Sekretária Meza Parlamentu Nasionál, Deputada Lídia Norberta fó-sai katak, ohin, sei iha plenária dahuluk Komisaun Permanente nian hodi halo deliberasaun molok halo diskusaun no aprovasaun kona-ba Estadu Emerjénsia.

Desizaun ne’e foti liuhosi reuniaun líder bankada ohin ne’e, atu deside kona-ba reuniaun dahuluk ba komisaun permanente ne’e.

“Entaun desizaun ne’ebé ohin halo iha líder bankada mak orsida lokraik tuku 15.00 sei iha plenária dahuluk komisaun permanente nian. Plenária dahuluk ba komisaun permanente ne’e sei halo deliberasaun atu konvoka plenária estraordinária ho objetivu prinsipál atu fó autorizasaun ba Prezidente-Repúblika dekreta Estadu Emerjénsia,” nia informa ba jornalista sira, hafoin reuniaun líder bankada, iha Parlamentu Nasionál, kuarta ne’e.

Deputada Lídia afirma, líder bankada parlamentár sira hola desizaun ne’e tanba oras ne’e mundu tama ona vaga daruak propagasaun COVID-19, tanba ne’e Timor-Leste tenke prepara-aan.

“Entaun Estadu mak iha dever asegura moris populasaun nian. Asegura ne’e mak tenke asegura povu hosi kualkér posbilidade ruma,” nia dehan. 

Nia dehan, oras ne’e parlamentu simu ona informasaun hosi Governu kona-ba desizaun ne’ebé solisita ona ba Prezidente Repúblika atu dekreta Estadu Emerjénsia maibé Estadu esesaun ne’e tenke hetan autorizasaun hosi Parlamentu Nasionál.

Iha reuniaun líder bankada ne’e partisipa hosi Ministru Asuntu Parlamentár no Komunikasaun Sosiál, Francisco Jerónimo.

Tuir Rejimentu Parlamentu Nasionál (RPN) artigu 35 (Komisaun espesializada permanente sira-nia kompeténsia) mak hanesan:

a) Diskute no fó pareser kona-ba projetu no proposta-lei, proposta ba alterasaun no tratadu hirak-ne’ebé submete ba Parlamentu;

b) Apresia petisaun sira-ne’ebé ema haruka ba Parlamentu;

c) Hatene tuir problema políticu no administrativu ne’ebé relasiona ho sira-nia knaar no fornese informasaun ba Parlamentu, wainhira Parlamentu hanoin katak konveniente, ne’ebé presiza ba apresiasaun atus Governu nian;

d) Hala’o audiénsia públika ho entidade sira husi sosiedade sivil;

e) Konvoca kualker titulár órgun Administrasaun Públika nian hodi fó informasaun kona-ba asuntu ne’ebé relasiona ho sira-nia knaar.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here