Turizmu doméstiku, bee-manas Marobo. Imajen Tatoli/António Gonçalves

DILI, 04 agostu 2020 (TATOLI)-Relasiona ho kondisaun infraestutura bee-manas Marobo iha Suku llat-Laun, Postu Administrativu Bobonaro, Munisípiu Bobonaro, ne’ebé hahú a’at ona, maka Sekretaria Estadu Formasaun Profisionál no Empregu (SEFOPE) hahú planu atu koordena ho Ministériu Turizmu, Komérsiu no Industria (MTKI) atu reabilita.

“Ita tau ona planu atu koordena ho liña ministeriál sira hanesan Ministériu Turizmu, Komérsiu no Industria, hodi bele reabilta infraestrutura bee-manas Marobo no sentru komunitáriu sira seluk ne’ebé parte SEFOPE konstroe ona,” tenik Sekretáriu Estadu Formasaun Profisionál no Empregu, Alarico de Rosário, ba Agência Tatoli,  bainhira partisipa diskusaun jornada orsamentál 2021, iha edifísiu Ministériu Finansa, Aitarak-laran, tersa ne’e.

Bazeia ba Rezolusaun Konsellu Ministru númeru 24/2013, fó dalan ba Sekretaria Estadu Polítika Formasaun Profisionál Empregu (SEPFOPE) atu implementa programa no hasa’e númeru empregu iha rai-laran, nune’e implementa ona programa turizmu komunitária iha fatin lima.

Fatin hirak ne’e maka hanesan Com iha Munisípiu Lautém, Mota Bandeira iha Munisípiu Ermera, Bee Manas Marobo iha Munisípiu Bobonaro, Rekiraka iha Munisípiu Viqueque no Seloi Kraik iha Munisípiu Aileu, maibé oras ne’e fatin hirak ne’e balun abandonadu, inklui Seloi Kraik.

Sekretáriu Estadu Alarico, dehan Governu tinan ne’e seidauk bele halo reabilitasaun ba sentru turizmu komunitáriu sira tanba nasaun la’o hela iha rejime duodesimál kuaze tinan tomak no hasoru situasaun COVID-19.

Tuir nia, SEFOPE sei koordena ho MTKI atu haree ba Lei Orgánika Governu, tanba sítiu turíztiku, bainbain ministeriu ne’e maka iha responsabilidade atu jere.

Governante ne’e nota, la’ós de’it bee-manas Marobo de’it maka presiza reabilita maibé presiza reabilita mós sítiu sira seluk hanesan Seloi Kraik iha Aileu no sítiu Lekiraka (Reki-Raka) iha Viqueque, One Dolar Beach iha Metinaro no Com, iha Munisípiu Lautém.

“SEFOPE mak uluk dezenvolve, ne’ebé presiza koordena malu atu halo termu entrega ruma ka koordena malu atu reabilita no halo jestaun di’ak liután,” nia akresenta.

SEFOPE mós sei koordena ho Sekretaria Estadu Komunikasaun Sosiál (SEKOMS) no MTKI atu promove sítiu turíztiku sira hodi atrai turista sira.

Antes ne’e, Diretór Jerál MTKI, José Filipe Dias Quintas, dehan MTKI presiza termu entrega hosi SEFOPE atubele dezenvolve no jere bee-manas Marobo inklui sítiu túriztiku sira, tanba SEFOPE maka uluk dezenvolve hodi halo jestaun di’ak liután.

Diretór ne’e nota katak sítiu ne’e dezenvolve ona, maibé laiha jestaun di’ak ba fatin sira ne’e no sei abandona.

Bee-manas Marobo reabilita hosi SEFOPE iha 2015 ho totál kustu $498.860 no inaugura iha loron 08 dezembru 2016 hosi Ministru Planeamentu no Investimentu Estratéjiku, Kay Rala Xanana Gusmão inklui Sekretáriu Estadu Polítika Formasaun Profisionál Empregu, Illídio Ximenes da Costa, iha VI Governu Konstitusionál nia tempu.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. Halo seidauk kle’ur reabilita fali ona. Hhhmmmm, uluk halo ne’e iha duni intensaun atu la halo ho kualidade karik.

HAKEREK NO HATÁN

Please enter your comment!
Please enter your name here