Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 03 agostu 2020 (TATOLI)Ministériu Petróleu no Minerál (MPM), sei kontinua planu VII Governu hodi harii empreza estatál ho naran Murak Rai Timor,SÁ hodi rekolla reseita alternativu iha setór minerál ba kofre Estadu.

“Governu liuhosi MPM fó apoia maka’as atubele harii empreza estatál ne’e (Murak Rai Timor,SA) atu sai hanesan Timor GAP, nune’e bele rekolla retornu ba Estadu ne’ebé daudaun ne’e hahú halo ona diskusaun,” tenik Ministru Petróleu no Minerál, Víctor da Conceição Soares, iha edifísiu Ministériu Finansa, Aitarak-Laran, segunda ne’e.

Governu deside avansa ho planu ne’e ho razaun daudaun ne’e Governu ho Parlamentu Nasionál hahú diskute Rejime kódigu Mineiru, ne’ebé presiza iha empreza estatál Timór nian iha área minerál atu Estadu bele investe hodi fó fali retornu ba kofre Estadu.

Governante ne’e dehan, empreza ne’e sei permite Estadu bele opera setór mineiru ne’ebé garante no dezenvolve setór rekursu minerál, liuliu ba fonte rendimentu nasionál no aumenta empregu ba sidadaun sira.

Iha tinan 2017, Governu liuhosi reuniaun Konsellu Ministru aprova proposta dekretu lei ne’ebé aprezenta hosi Ministru Estadu no Ministru Rekursu Minerál, Mariano Asanami Sabino (VII Governu) kona-ba estatutu Kompañia Murak Rai Timor, SÁ hodi hala’o atividade.

Kompañia ne’e ho kapitál hosi Estadu, ho objetivu atu realiza atividade minerál inklui atividade ba rekoñesementu peskiza, avaliasaun, dezenvolvimentu, esplorasaun no tratamentu halo prosesamentu refinasaun inklui komersializasaun rekursu minerál.

Murak Rai Timor sei sai hanesan sosiedade komersiál direitu privadu nian no kapitál integrál públiku.

Medida ne’e tama iha estratejia Governu nian kona-ba harii instituisaun ne’ebé garante dezenvolvimentu setór ekonómiku ho nia poténsia boot hodi kontribui ba diversifikasaun ekonomia ne’ebé maka fundamentál.

Iha loron 6 juñu 2017, dekretu lei kriasaun empreza nasionál mineira ne’e hetan revizaun no aprovasaun tan hafoin hetan sujestaun hosi Prezidente Repúblika atu adapta tuir Rejime Jerál Aprovizionamentu nian.

Faze dahuluk Governu sei tau orsamentu hamutuk $400.000 hodi ajuda dezenvolvimentu iha prosesu diversifikasaun fundu reseita ba futuru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here