DILI, 03 agostu 2020 (TATOLI)—Komisaun B (Negósiu Estranjeiru, Defeza no Seguransa) sei haree didi’ak proposta-lei alterasaun kona-ba migrasaun no azilu tanba iha komplikasaun ho regra konsitusionál.
Parlamentu Nasionál ajenda ona proposta-lei númeru 19/V(2a)-altersaun dahuluk Lei númeru 11/2017, 24 maiu kona-ba Lei Migrasaun no Azilu, maibé seidauk diskute iha plenária tanba Komisaun B sei haree didi’ak.
“Primeira alterasaun ba migrasaun no azilu ne’e sei iha prosesu tanba ninia komplikasaun ne’e da’et mós bai ta-nia konstituisaun, tan ne’e mak Komisaun B sei hela hela atu halo nia relatóriu no pareser finál,” Prezidente Komisaun B (Negósiu Estranjeiru, Defeza no Seguransa), Deputadu Agustinho Siqueira “Somotxo”, informa ba jornalista sira, iha Parlamentu Nasionál, segunda ne’e.
Nia hatutan, daudaun ne’e Governu buka hela alternativa para iha kompeténsia maibé hanesan Lei Kriminaliza Dfimasaun karik kontra konstituisaun, entaun Komisaun B sei haree didi’ak lai alterasaun ba lei migrasaun no azilu ne’e katak tenke haree didi’ak hodi tuir dalan,” Eis Ministru Defeza no Seguransa ne’e hateten.
Entretantu Primeiru-Ministru (PM), Taur Matan Ruak, husu Parlamentu Nasionál (PN) atu aselera alterasaun ba Sistema Saúde, Lei Migrasaun no Azilu nune’e ajuda Governu kombate pandemia COVID-19.
Xefe Governu haktuir, problema ida mak presiza ajuda kona-ba lei sira Governu haruka dekretu-lei ba Prezidente Repúblika kona-ba vijilánsia epidemiolójika ho sanátaria, maibé Tribunál Rekursu deklara inkonstitusionál, tanba ne’e Prezidente Repúblika haruka fila ba Governu.
“Agora ita-nia alternativa ida de’it. Parlamentu Nasionál bele ajuda ami, primeiru halo alterasaun ba lei sistema saúde, lei imigrasaun no azilu no lei protesaun sivil maibé lei protesaun sivíl Parlamentu Nasionál aprova ona,” PM Taur ko’alia asuntu ne’e iha aprezentasaun relatóriu aplikasaun Estadu Emerjénsia (EE) durante fulan-tolu, iha plenária Parlamentu Nasionál, foin lalais ne’e.
Alterasaun Sistema saúde ne’e ligadu ba propagasaun COVID-19 ne’ebé oras ne’e afeta mundu, lei migrasaun no azilu ne’e sei haree ba sirkulasaun sidadaun sira hosi rai-laran no ba rai-li’ur.
Ho alterasaun lei importante rua ne’e, hodi ajuda Governu bele minimiza no atu hili alternativa seluk katak estadu emerjénsia.
“Maibé ida-ne’e mak kondisaun laiha. Ita iha dalan ida de’it, para ita-nia asaun sira labele konsidera inkonstitusionalidade, ita hili estadu emerjénsia iha liña fronteira. Tanba ne’e, ami presiza liu apoia Parlamentu Nasionál nian, se ita hili Estadu emerjénsia permanente iha fronteira Governu disponivel ba opsaun ida-ne’e,” PM Taur Matan Ruak hateten.
Maibé, tuir nia, PN altera lei sira-ne’ebé nesesáriu para enkuadra ita-nia esforsu hodi kontrola fronteira, entaun sira presiza ajuda hosi Parlamentu Nasionál,” nia hateten.
Jornalista : Evaristo Soares Martins
Editór : Cancio Ximenes
