Plenária Parlamentu Nasionál. Imajen Tatoli/António Gonçalves

DILI, 30 jullu 2020 (TATOLI)—Komisaun F (Saude, Seguransa Sosiál no Igualdade Jéneru) iha Parlamentu Nasionál rekomenda ba Governu liuhosi Ministériu Saúde atu fasilita ekipamentu médiku no ekipamentu protesaun pesoál ba profisionál saúde hodi kontinua luta kontra propagasaun surtu COVID-19.

“Bazeia ba informasaun sira-ne’ebé relata hosi autoridade munisípiu no observasaun hosi Komisaun F hato’o ba Ministériu Saúde atu fasilita ekipamentu médiku no ekipamentu protesaun pesoál ba profisionál saúde sira hodi luta kontra COVID-19 tanba nasaun viziñu Indonézia númeru pozitivu sa’e makaas,” Relatora, Helena Martins Belo, ne’ebé akompaña hosi Prezidente F, Deputadu Noé da Silva Ximenes “Buka Tuir”, ne’ebé aprezenta rezultadu fiskalizasaun iha Munisípiu Manufali ba plenária Parlamentu Nasionál, kinta ne’e.

Iha relatóriu fiskalizasaun ba Munisípiu Manufahi ne’e Komisaun F nota autoridade munisípiu no serbisu hamutuk entidade relevante hala’o sensibilizasaun no prevensaun ba surtu COVID-19 ho atividade  mak hanesan fase-liman kada loron, uza máskara, hapara temporariamente serimónia kulturál, hapara movimentu transporte públiku.

Nune’e mós Munisípiu Manufahi kontinua hala’o vijilánsia no rega dezinfetante ba transporte privada, taka stiker kona-ba medida prevensaun hosi Organizasaun Mundiál Saúde (OMS) no hapara atividade sosiál sira seluk.

Iha relatóriu fiskalizasaun ne’ebé aprezenta hosi Komisaun F ne’e deteta timoroan sira-ne’ebé hetan karantina iha Munisípiu Manufahi hamutuk ema na’in-22 inklui ema na’in-15 hosi Dili no ema na’in hirak ne’e reintrega tiha ona ba família.

“Ekipamentu protesaun pesoál seidauk iha distribuisaun ekipamentu ba profisionál saúde sira-ne’ebé destaka iha liña frente maibé sira ho konsiénsia kontribui orsamentu hodi sosa protesaun hanesan jas hujan (kapa-udan) no luvas,” nia dehan.

Iha fiskalizasaun ne’e deskobre ministériu kompetente seidauk aloka orsamentu hosi fundu COVID-19 ba munisípiu hodi halo kobertura ba despeza ne’ebé liga ho kombate surtu COVID-19.

Deputada Helena Martins ne’ebé aprezenta relatóriu fiskalizasaun ne’e hateten, pesoál saúde iha Manufahi limitadu tebes atu atende komunidade bainhira surtu ne’e afeita populasaun.

Bazeia Komisaun F nia fiskalizasaun nota programa saúde balun la implementa tanba implementasaun Estadu Emerjénsia liga ho pandemia surtu COVID-19.

Iha fiskalizasaun haree katak iha item balun hosi aimoruk mak liu ona prazu no armazein ne’ebé rai aimoruk la seguru atu konserva no proteje medikamentu tanba hetan ameasa hosi inundasaun bainhira tempu udan.

Ho preokupasaun hirak ne’e Komisaun F hato’o rekomendasaun mak hanesan fasilita ekipamentu protesaun pesoál, prosesa lalais pagamentu ba pesoál saúde ne’ebé serbisu iha liña frente.

Nune’e mós komisaun rekomenda ba Ministériu Saúde hato’o monitorizasaun no rejista regulár kona-ba pedidu distribuisaun medikamentu ba ospitál, sentru saúde no postu saúde sira.

Komisaun F rekomenda ba Ministériu Saúde atu halo manutensau regulár ba ekipamentu médiku no transporte, ambulánsia no karreta multi-funsaun hodi bele fasilita serbisu no implementasaun programa saúde iha Manufahi.

Komisaun F rekomenda ba MS ho koordenasaun servisu saúde munisipál hodi identifika forsa traballu profisionál saúde hodi reforsa servisu iha sentru no postu saúde sira.

Iha rekomendasaun Komisaun F nian husu MS no serbisu saúde munisipál atu propoin iha orsamentu kona-ba kontrusaun valeta ka bee-dalan iha armazein aimoruk nune’e proteze armazen hosi inundasaun.

Iha relatóriu fiskalizasaun Komisaun F ne’e mós husu MS atu haree kondisaun rezidénsia ba médiku no pesoál saúde iha nível sentru saúde no psotu saúde iha área remota.

Ikus, liu Komisaun F rekomenda ba MS no saúde munisipál atu kontrola prestasaun serbisu pesoál farmásia iha sentru no postu saúde sira inklui pesoál serbisu iha armazen hodi rejista ka rekapitulasaun regulár ba item aimoruk.

Relatóriu vizita ne’e hetan apresiasaun no aprova iha sede Komisaun F nian iha Parlamentu Nasionál iha loron 2 jullu 2020, ho rezultadu votasaun a-favór 7, kontra 0 no abstensaun 0. Relatóriu ne’e ohin aprezenta on aba plenária, Parlamentu Nasionál.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here