DILI, 29 jullu 2020 (TATOLI)-Adjuntu Reprezentante UNICEF iha Timor-Leste, Scoot Whoolery, hateten nia parte sei esforsu atu kontinua fó tulun ba Ministériu Edukasaun Juventude no Desportu (MEJD) hodi rekopera prosesu aprendizajen ho seguru ba estudante sira tanba impaktu husi COVID-19.
Objetivu husi apoiu UNICEF nian ne’e la’ós de’it atu re-ativa prosesu aprendizajen ba estudante sira maibé sira hakarak atu rekopera aprendizajen ida seguru ba estudante sira.
Nia hato’o kestaun ne’e durante worshop ida ne’ebé maka organiza husi MEJD ba Inspetór Eskolár, no Dirijente sira husi Munisípiu 12 inklui Rejiaun Administrativa Espesiál Oé-Cusse Ambeno (RAEOA) iha Otél Novo Turizmu Dili.
“Ita realiza worshop hamutuk ho Dirijente no Inspetór Eskolár sira husi kada Munisípiu inklui Rejiaun Administrativu Espesiál Oé-Cusse Ambeno (RAEOA) atu hanoin hamutuk la’ós de’it atu re-ativa fali eskola sira maibé iha intensaun oinsá ita atu rekopera fali aprendizajen ho seguru ba labarik sira,”tenik tan.
Organizasaun Internasionál ne’e, apresia ba Governu liuhosi Ministériu Edukasaun Juventude no Desportu tanba konsege re-ativa ona prosesu aprendizajen ba estudante sira maski seidauk atinje pursentu 100.
Tanba ne’e, nia husu ba entidades hotu atu kolabora hodi fó liman ba malu ho di’ak liután para bele re-ativa ona eskola hotu-hotu iha tempu badak.
Jornalista : Tomé Amado
Editór : Agapito dos Santos
