Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 29 jullu 2020 (TATOLI) – Ministru Obras Públiku (MOP), Salvador Eugênio Soares dos Reis Pires, ohin, kumpre notifikasaun Ministériu Públiku (MP) nian hodi marka prezensa iha edifísiu Prokuradór Jerál Repúblika (PGR, sigla portugés), iha Dili, hodi presta deklarasaun ka submete ba investigasaun ba indísiu kazu balun ne’ebé sei iha hela segredu justisa.

Tuir observasaun jornalista Agência Tatoli nian nota katak prezensa Ministru Salvador Eugênio Soares dos Reis Pires nian iha edifísiu PGR ho karreta privadu marka avanza purvolta tuku 08:00 Otl, no to’o tuku 09:00 Otl, tama ba hasoru Prokuradór titular hodi submete ba investigasaun ka presta deklarasaun.

Prosesu investigasaun ka presta deklarasaun ne’e han durasaun tempu oras haat ho balun nia laran, hahú hosi tuku 09:00 Otl to’o fali tuku 13:30 Otl.

Jornalista sira hosi meiu komunikasaun sosiál (televizaun, radio, jornál no online) ne’ebé hein hela atu bele hetan entrevista ruma hosi Ministru Salvador Pires, kona-ba prosesu investigasaun ida-ne’e, maibé hafoin presta tiha deklarasaun ba MP, Ministru Salvador la liuhosi odamatan boot hodi hasoru jornalista sira.

Ministru Salvador ho nonook de’it sai hosi odamatan kotuk, sa’e karreta prado kór metan liu kedas no la konsege fó hela mensajen ruma ba jornalista sira ne’ebé standby hein prosesu investigasaun ne’e too remata.

Jornalista sira tenta atu halo konfirmasaun ba parte Ministériu Públiku ka Prokuradór titular hanesan nain ba asaun penál, maibé seidauk bele fó sai informasaun detalladu ruma kona-ba prosesu ne’e tanba sei iha hela investigasaun nia laran.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here