Majór Jenerál Lere Anan Timur. Imajen Tatoli/António Gonçalves

DILI, 29 jullu 2020 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, hatete Governu aloka rihun $100 ba komemorasaun aniversári Forças Armadas da Libertação Nacional de Timor-Leste (FALINTIL) ba dala 45 ne’ebé sei selebra iha loron 20 agostu tinan ne’e. 

Lere Anan Timur hatutan, enkontru ho PR ne’e ko’alia liu kona-ba aniversáriu ezisténsia FALINTIL ba dala-45 (20/08/1975-20/08/2020) ne’ebé sei selebra ho atividade “Tour FALINTIL 2020”. 

“Ohin ami foka liu ba loron 20 agostu ba ezisténsia FALINTIL ne’ebé mak halo tinan dala-45. Iha komemorasaun ne’e, komandante sira dehan sei hala’o eventu balun iha 20 agostu. Ohin mós, ha’u relata eventu balun ba ita-nia Prezidente Repúblika, primeiru eventu mak ‘Tour FALINTIL 2020’,” dehan Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, ba jornalista sira hafoin hosoru malu ho Xefe Estadu Timor-Leste iha Palásiu Prezidente Nicolau Lobato, Bairru Pité, Dili, kuarta ne’e. 

Osan rihun $100 ne’e, Lere hateten, barak ona tanba ne’e mak F-FDTL halo tour ne’ebé mak inisiativa ne’e mai hosi  komandante komponente navál nian tanba komandante ne’e mak aprezenta proposta refere.

Lere Anan Timur relata, tour ne’e militár sira ka ofisiais ne’ebé la’o haleu Timor-Leste ne’e sei sai hosi Dili, Kuartel Jerál no kalan toba iha Bobonaro no komemora 20 agostu hamutuk ho komunidade no ema rezisténsia ninian iha ne’ebá, no hala’o mós asaun solidaridade.  

Iha tour ne’e, Lere Anan Timur hateten, sei halo reflesaun kona-ba loron FALINTIL (20 agostu) nian ba komunidade sira no mós halo konviviu ho komunidade sira.

Nia hatutan, rute ba tour ne’e mak hafoin ramata loron 9 agostu sai hosi Bobonaro la’o liu ba Suai depois toba iha Betano tanba Bobonaro simboliza rejiaun kuatru (4) no Betano simboliza rejiaun tres (3), depois loron 10 agostu ba Kraras (Viqueque) no simboliza ho rejiaun dois (2), loron 11 agostu hakat ba Iliomar (Lautem) no 12 agostu ba falo Lospalos.

“Iha komemorasaun ne’e ita hala’o hamutuk ho ita-nia komunidade no ema rezisténsia sira no sei halo mós asaun solidariedade ka fó buat ruma ne’ebé mak ita-nia komunidade sira presiza, hanesan fahe fós ka mina ruma ba ita-nia komunidade sira,” nia relata.

Tuir Lere Anan Timur, iha 20 agostu ne’e iha eventu barak mak sei realiza mak hanesan levantamentu, konferénsia nasionál hanesan halo reflesaun ida liuliu ba ofisiais veteranu ne’ebé mak la’o ho sira

Nia hateten, eventu ida-ne’e la’ós F-FDTL mak organiza maibé inklui mós ho Konsellu Veteranu sira no Ministru Asuntu Libertasaun Nasionál (MALN) no Ministru Administrasaun Estatál (MAE).

“Agora ha’u fila, ha’u sei koordena ho Ministru Administrasaun Estatál atu haree no organiza fatin sira ne’e,” nia dehan.

Tuir nia katak ofisiais ne’ebé mak tuir tour ne’e mínimu mak ema 200 maibé liu ida-ne’e mós bele maibé lojístika ne’e ida-idak nia responsabilidade tanba loron 20 agostu ne’e loron nasionál. 

“Loron 20 agostu ne’e, loron nasionál ne’ebé tuir loloos ne’e Forças Armadas da Libertação Nacional de Timor-Leste (FALINTIL) no Frente Revolucionária de Timor-Leste Independente (FRETILIN) ne’e sempre la’o hamutuk,” nia hateten.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here