Komunidade Ilimanu, Suku Uma-Kaduak, Postu Administrativu Laclo, Munisípiu Manatuto, partisipa másimu sosializasaun projetu peskiza mármore, kuarta (29/07). Imajen Tatoli/Florêncio Miranda Ximenes

MANATUTO, 29 jullu  2020 (TATOLI)-Autoridade Nasionál Petróleu no Minerál (ANPM) hamutuk ho Kompañia Elegant Marble Group unip, limitada (EMG) no kompañia lokál Uma Marble Timór (UMT), lda, hala’o sosializasaun ba projetu estudu ka peskiza mármore ba komunidade iha área Ilimanu, Suku Uma-Kaduak, Postu Administrativu Laclo, Munisípiu Manatuto.

ANPM hodi naran Ministériu Petróleu no Minerál (MPM) asina ona kontratu  prospesaun ho empreza EMG, hosi Xina atu halo peskiza mármore kuaze ektare 16.000, ho durasaun  peskiza durante fulan-18 ho kustu orsamentu $800.000.

Enkuantu ANPM ho empreza UMT ho durasaun peskiza tinan-ida, iha área peskiza ektare 400 no kustu orsamentu $600.000, inklui área peskiza iha parte norte Postu Administrativu Laclo ho ektare 400.

“Empreza ne’ebé maka asina ona kontratu peskiza, tuir duni kontratu hodi halo diseminasaun informasaun  ba komunidade sira, hafoin halo peskiza  ba ita-nia rekursu mármore iha fatin ne’e hodi tenta komprende kuantidade no kualidade, hafoin ba oin bele investe hodi dezenvolve,” tenik Vise-Prezidente ANPM, José Gonçalves, liuhosi ninia diskursu iha ámbitu sosializasaun iha Ilimanu, kuarta ne’e.

Vise-Prezidente ANPM esplika, kona-ba naturareza ba peskiza, empreza EMG no UMT seidauk bele hasai fatuk ruma iha área ne’e maibé sei halo peskiza de’it hodi kompañia haree didi’ak rekursu ninia kualidade no kuantidade.

“Ita-nia komunidade ninia partisipasaun mak sei bele fó susesu liu ba empreza EMG-UMT atu halo peskiza, ne’ebé ita disemina informasaun sira ne’e atu ita bo’ot sira hotu bele serbisu hamutuk,” José Gonçalves subliña.

ANPM ne’e mós rekomenda ba empreza rua ne’e hodi bele koopera ho lian-nain sira hodi loke dalan no fó matak malirin bainhira halo peskiza iha área Ilimanu.

Governu liuhosi ANPM kontinua koopera no suporta empreza EMG-UMT atu kontinua peskiza to’o susesu liuhosi lian-nain Ilimanu-Laclo hodi fó matak malarin no loke dalan.

Empreza husu komunidade nia kooperasaun atu halo peskiza la’o ho susesu

Sorin seluk, Reprezentante Empreza EMG, Noé  Bernardo de Carvalho, hateten kompañia internasionál ne’e iha esperiénsia barak ona iha atividade peskiza no halo esplorasaun hodi lori ba merkadu internasionál iha Xina, Uniaun Europeia, no Singapura.

“Ami-nia peskiza sei foti de’it amostra balun hodi hatene nia kualidade no kuantidade, maibé ami husu nafatin komunidade atu apoia ami atu halo peskiza ho susesu, liuliu ami husu matak malirin hosi lisan sira,” nia akresenta.

Nia dehan, iha peskiza ne’e, empreza sei foti amostra mármore iha área peskiza hodi hala’o teste iha rai-li’ur atu haree kualidade, hafoin hato’o relatóriu no dezeñu ba Governu ANPM atu bele halo mapamentu hodi halo esplorasaun no buka merkadu ba mármore.

“Ami sei halo rekrutamentu no fó formasaun ba Ilimanu oan-sira atubele serbisu hamutuk ho ami iha ekipa peskiza,” nia promete

Iha biban hanesan, Prezidente Autoridade Munisípiu Manatuto, Fernando de Sousa, husu ba komunidade Manatuto, liuliu komunidade Ilimanu atu koopera ho kompañia rua ne’e hodi bele susesu iha peskiza.

“Ha’u husu ba komunidade hotu atu fó kontribuisaun másimu atu atividade peskiza ne’e la’o ho di’ak no husu atu lian-nain sira koa’alia hodi fó matak malarin ba tékniku sira bele halo peskiza,” Autoridade Manatuto ne’e sujere.

Nune’e, nia espera katak kompañia rua ne’e bele susesu iha peskiza atu iha futuru bele esplora riku-soin ne’e hodi dezenvolve ekonomia iha Manatutu no Timor-Leste.

“Ita hakarak rai ne’e ba oin, ita mós tenke kontribui, tanba foin mak atu halo peskiza atu haree de’it ita-nia rekursu  mármore nia kualidade no kuantidade, tanba ne’e tenke apoia hodi peskiza ne’e to’o susesu atubele esplora tan iha futuru,” nia akresenta.

Autoridade lokál hakarak apoia kompañia

Xefe Suku Uma-Kaduak, Filomeno de Sousa, lori komunidade tomak iha suku ne’e apoia tebes kompañia rua atubele halo peskiza ho susesu.

“Ita-nia komunidade hotu prontu apoia kompañia sira atu halo peskiza no prontu atu fasilita hodi ko’alia ho uma-lisan tuir kultura atubele fó matak malirin no loke dalan ba peskiza ne’e ho susesu,” nia promote.

Delegadu Ilimanu, Manuel Victor Fernades, reforsa komunidade prontu atu koopera liuhosi lian-nain sira atu loke dalan no fó matak malirin ba ekipa tékniku sira.

“Ami husu atu iha períodu peskiza bele mós halo rekrurtamentu ba Ilimanu-oan atubele serbisu hamutuk ho kompañia sira, kompañia hataan ho pozitivu tebes,” nia akresenta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here