Komunidade sira iha Sede Suku Bairo Pite tuur tutuir malu hodi implementa distansia sosial atu simu subsidiu $200 hosi Governu. Imajen/Antonio Goncalves.

DILI, 28 jullu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten ekipa verifikasaun MSSI nian kontinua la’o hela no horisehik ekipa ne’e konsege hatama ona dadus reklamasaun hamutuk 10.236 hosi totál reklamasaun hamutuk 14.175. 

Notísia Relevante: Iha Faze Rekonsiliasaun Dadus, MSSI Rejistu Reklamasaun Provizoriu 14.000-Resin

“Horiseik ita-nia ekipa verifikasaun MSSI nian hatama ona dadus reklamasaun hamutuk 10.236, maibé antes ne’e ita iha reklamasaun hamutuk 14.175. Ohin, ita avansa tan ona no hein iha semana ne’e nia-laran, ita espera bele finaliza ona,” Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten ba jornalista sir aiha nia servisu fatin MSSI, Caicoli, Dili, tersa ne’e. 

Tuir nia, ekipa avaliasaun ba reklamasaun ne’e sei mai hosi Ministériu Administrasaun Estatál (MAE) no MSSI tanba ligadu ho dadus. Se dadus balun la haruka mai karik, nia dehan, entaun presiza MAE mak verifika no bele deside.

Diretór ne’e haktuir, xefe família 14.175 ne’ebé mka iha lista reklamasaun ne’e la garente atu simu hotu subsídiu $200 tanba reklamasaun balun la tama kakutak entaun la elizivél, entaun depois mak deside katak hosi 14.175 ne’e, elizivél hotu ka lae.

“Osan ne’ebé mak aloka ba pagamentu subsídiu $200 ba xefe família hamutuk 63,705,400 no osan ne’ebá mak selu ona ne’e iha 59,961,600. Entaun, ita-nia osan saldo purvolta millaun $3-resin mak hela,” nia esplika.

Ho ida ne’e, nia dehan, hosi millaun $3-resin ne’e, se bele selu ba reklamasaun hamutuk 14.175 no reklamasaun ne’e la signifika atu simu hotu, ne’ebé osan ne’e sufisiente hela no bele responde ona.

“Miliaun $3-resin ne’e, ita sei asegura hela iha banku hodi hein ba reklamasaun no osan hirak ne’e inklui mós ho osan ne’ebé mak benefisiáriu sira fó fila tanba ho razaun saláriu liu $500. Ne’ebé, ita sei garante hela ho osan ne’e. Banihira pagamentu ba reklamasaun ramata mak foin hatene osan restu hira,” nia dehan.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here