Aeroportu Prezidente Nicolau Lobato, Comoro, Dili. Imajen/Espesiál

DILI, 27 jullu 2020 (TATOLI) – VIII Governu Konstitusionál liuhosi ekipa tékniku liña ministériál hahú esforsu maka’as atu aselera no finaliza planu mestre hodi bele hahú konstrusaun Aeroportu Internasionál Prezidente Nicolau Lobato, Comoro.

Ministru Transporte no Komunikasaun, José Agostinho da Silva, informa iha semana kotuk, ekipa servisu interministeriál ba planu mestre hatudu progresu di’ak ona atu aselera lalais konstrusaun Aeroportu Comoro ho kualidade di’ak tuir padraun internasionál.

“Ita eforsu hela iha inísiu 2021 ne’e ita bele aselera ita-nia konstrusaun Aeroportu Prezidente Nicolau Lobato tuir oráriu ne’ebé ekipa interministeriál trasa no tuir planu VIII Governu Konstitusionál nian,” tenik Ministru José Agostinho, segunda ne’e iha Palásiu Governu.

Tuir nia, orsamentu ba konstrusaun Aeroportu Internasionál ne’e hosi impréstimu Banku Dezenvolvimentu Aziátiku (ADB, sigla inglés) hamutuk millaun $100 no Governu mós aloka ona millaun $30 ne’ebé orsamentu ne’ebé iha hamutuk millaun $130, tanba konstrusaun aeroportu ne’e sei presiza millaun $480.

“Ha’u ko’alia ona ho Embaixadór Japaun iha Timor-Leste ne’ebé kontinua hatudu kompromisu apoia osan millaun $44, ne’ebé agora iha prosesu hela atu fasilita ita, inklui ajénsia internasionál balun mós hakarak apoia,” nia akresenta.

Nune’e, governante ne’e espera iha tempu besik ekipa tékniku liña ministeriál bele aprezenta planu mestre tanba investimentu ho kustu boot presiza esforsu hosi liña ministeriál hodi haree ho didi’ak planu konstrusaun nian.

“Tanba ita hakarak konstrui aeroportu ida di’ak no kualidade atu fasilita movimentu transporte aéreu atubele rekolla reseita ba kofre Estadu Timor-Leste,”nia subliña.

Kona-ba komunidade afetadu, nia dehan Governu sei halo indemnizasaun ba sira atu husik fatin, molok halo konstrusaun ba aeroportu ne’e.

Entretantu, Governu Japaun mós kontinua hatudu kompromisu atu apoia orsamentu millaun $44 hodi konstrui aeroportu ba komponente lima hanesan terminál ba passajeiru, tore kontrolu, tax way (fatin impostu), access road (asesu rodovia) no fatin para aviaun.

Governu Timor-Leste sei halo konstrusaun ba estensaun pista to’o kilometru tolu tuir planu asaun VIII Governu rasik no tuir planu konstrusaun ne’e sei termina iha tinan-tolu.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here