Primeiru-Ministru, Taur Matan Ruak, hamutuk ho Membru Governu sira partisipa aprezentasaun relatóriu ba aplikasaun Estadu Emerjénsia, iha sala plenáriu PN, tersa (28/07). Imajen Tatoli/Egas Cristovão

DILI, 28 jullu 2020 (TATOLI) – Governu liuhosi Ministru Prezidénsia Konsellu Ministru, Fidelis Manuel Leite Magalhães, deklara katak medida ekonómiku sira ne’ebé mak Governu liuhosi Konsellu Ministru aprova ligadu ho implementasaun Estadu Emerjénsia ba prevensaun surtu COVID-19 barak maka implementa ona.

Relasiona ho medida sira, Governu antes ne’e aprova no aprezenta iha Parlamentu Nasionál (PN) hamutuk medida neen no asaun hamutuk 19 ne’ebé sei implementa.

“Medida no asaun ne’e, ninia métodu la hanesan, balun rekere ita lori osan hodi bele implementa, maibé balun maka Governu halo de’it inzensaun. Hanesan ezemplu subsídiu ba eletrisidade no bee-moos,” esplika Ministru Fidelis iha ámbitu aprezentasaun relatóriu implementasaun Estadu Emerjénsia ba COVID-19 iha sala planáriu PN, tersa ne’e.

Iha medida subsídiu ba eletrisidade no bee-moos, ninia asaun mak fó $15 ba kada kliente Eletricidade de Timor-Leste (EDTL) ba kada fulan durante fulan-rua inklui subsídiu fulan-rua ba bee-moos.

“Ba eletrisidade nia orsamentu orjinál aloka millaun $7,686, ida ne’e implementa ona no ba bee-moos ho totál orsamentu millaun $4,2,” nia akresenta.

Medida seluk ne’ebé mak implementa ona maka apoia subsídiu ba uma-kain, ne’ebé tuir dadus uma-kain hamutuk 214.827 makbé ikus mai bainhira halo rejistu númeru ne’e sa’e ba 300.000-resin, ne’ebé orsamentu ba medida ne’e ho proposta inisiál hamutuk millaun $15 maibé hafoin iha diskusaun haree ba dadus uma-kain sa’e ba millaun $65,556.

Kona-ba apoia ba traballadór sira ho númeru traballadór hamutuk 30.000, ninia implementasaun la’o hela maibé ninia métodu mak Institutu Nasionál Seguransa Sosiál (INSS) halo hafoin Governu re-embolsa, maski iha buat balun la’o tiha ona maibé Governu seidauk re-embolsa.

“Tanba ne’e mak iha ninia persentajen ezekusaun sei zero hela, maibé medida ne’e la’o hela, to’o jullu besik 2.000 traballadór mak hetan ona benefísiu hosi medida ne’e, ne’ebé maka 293 hosi 1993 maka motorista iha setór transporte no pagamentu ne’ebé INSS halo ona ho montante $656.176 ne’ebé antes ne’e ita aloka orsamentu millaun $14,188. Kona-ba izensaun ba kontribuisaun seguransa sosiál ne’e mós hanesan,” nia esklarese.

Ministériu Justisa (MJ) halo mós izensaun ba sira ne’ebé mak okupa propriedade Estadu, ne’ebé ninia lista ba progresu ezekusaun sei iha rekonsiliasaun hela.

Medida seluk mak apoia subsídiu ba estudante timor-oan naun bolseiru iha rai-li’ur, ne’ebé tuir dadus ne’ebé mak simu antes ne’e iha estudante naun bolseiru 3.488 no medida ne’e ninia implementadór mak Ministériu Negosiu Estranjeiru no Kooperasaun (MNEK), ho fundu orijinál millaun $2,404, maibé hafoin ajusta ninia fundu atuál $3.273.696, ne’ebé gastu tiha ona hamutuk millaun $1,343, ne’ebé kompila ba persentajen hamutuk porsentu 41,5.

Medida kona-ba transporte no konetividade iha subsídiu ba aviaun Dili-Darwin tuir proposta ne’ebé Governu hato’o $585.000, maibé hafoin alterasaun no halo ajustamentu, ninia fundu sa’e ba millaun $1,673 no konsege gasta ona millaun $1,118.

“Aviaun semo bá-mai hamutuk dala 30, pasajeiru hamutuk 71 no sasán ne’ebé tula ho kuantidade kilograma 11.085,” Fidelis informa.

Ba distribuisaun sasán Sentru Lojíztika Nasionál (CLN, sigla portugés) halo proposta atu sosa foos.

“Fundu orjinál ho valór $18.216.815, hafoin hetan invoice no finaliza prosesu hamutuk valór millaun $17,35, ne’ebé gastu totál millaun $16,500, ne’ebé korresponde gastu totál ho porsentu 86,9,” nia esplika.

Medida ida kona-ba garantia produsaun agrikultura no peska, ne’ebé daudaun implementa hela no nia orsamentu orijinál millaun $4,952, maibé hafoin halo rekonsiliasaun sai millaun $2,437, ne’ebé gasta tiha ona millaun $1,793 no korresponde ho porsentu 73,6.

Nia refere kona-ba transporte sasán bá-mai Dili-Atauru, medida ne’e seidauk implementa no orsamentu ne’ebé aprezenta hosi Governu ba medida ne’e hamutuk $90.000.

Ministériu Transporte no Komunikasaun (MTK) halo tiha ona pedidu atubele asesu ba Fundu COVID-19 hodi implementa medida ne’e.

Iha medida tuirmai, transportasaun hosi portu ba armazen sira ne’ebé seidauk implementa, ho orsamentu ne’ebé Governu prevee ho montante $180.000.

Ba telekomunikasaun, atu sosa mensajen ajuda transferénsia osan seidauk tanba mensajen ne’ebé realiza ona ne’e hetan apoia hosi empreza telekomunikasaun sira.

Nune’e mós, subsídiu internet no konetividade ba estudante sira seidauk implementa, ho alokasaun orsamentu orijinál hamutuk $600.000.

Implementasaun mensajen alerta COVID-19 ba ema ne’ebé ho sintoma, ho osan alokadu hamutuk $260.000 seidauk konsege ezekuta.

Komponente kréditu kona-ba pagamentu osan ba sira ne’ebé maka foti osan hosi banku sira, atualmente medida ne’e harii hosi Dekretu-Lei númeru 22/2020, 5 juñu kona-ba moratóriu no komprimentu ba obrigasaun urjente ba kontratu konsensaun dekretu no polítika ekonómika ba resposta COVID-19.

“Nia prosedimentu iha akordu, iha hela Ministériu Koordenadór Asuntu Ekonómiku (MKAE) nia liman ne’ebé iha asinatura hosi Banco Central Timor-Leste (BCTL) hodi fasilita implementasaun, maibé bainhira halo revizaun ba fundu ne’e hosi proposta inisiál millaun $8,182 sai millaun $5,” nia subliña.

Ministru ne’e haktuir, iha 24 jullu medida ne’e ninia implementasaun la’o hela.

“Kona-ba empréstimu emerjénsia ne’e seidauk hahú, ho orsamentu orijinál hamutuk millaun $3. Bainhira atu implementa sei kria tán dekretu-lei ida,” nia akresenta.

Nune’e mós, implementasaun ba fasilidade importasaun nian, kréditu ba importadór sira, ho orsamentu inisiál millaun $5 maibé seidauk konsege implementa.

Apoiu finansiál tempu badak ba entidade finanseira sira ne’e mós ho previzaun orsamentu millaun $3,500, maibé mós seidauk implementa.

“Medida tolu ne’e sei koordena ho Banku Sentrál tanba presija dekretu-lei ida,” nia dehan.

Tuir governante ne’e ezekusaun Fundu COVID-19, Governu nia medida sira regula ho Dekretu-Lei 19/2020, ne’ebé iha lejizlasaun ne’e rasik liuliu iha artigu 5 ko’alia kona-ba ezekusaun ne’ebé ituir rekezitu sei ezekuta ho rejime jurídiku aprovizionamentu no rejime públiku aprovizionamentu.

Iha artigu 5 númeru 2 alinea b dehan, diretór jerál ho kompeténsia iha área finansa nian, bele fó atribuisaun kompeténsia ba sira iha ajudikasaun asinatura kontratu públiku nian.

Entaun ida ne’e katak regulamentu Fundu COVID-19 fó dalan atu diretór jerál sira bele asina kontratu sira ne’ebé ho montante menus hosi millaun $1, ida-ne’e maka Dekretu-Lei númeru 19/2020 hatudu,” tenik Ministru Fidelis.

Portavóz VIII Governu ne’e esplika, kona-ba kontratu sira ne’ebé dezagrega ninia montante millaun $1 mai kra’ik, enkuantu millaun $1 ba leten sei iha impedementu legál ne’ebé maka Governu sei hasoru.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here