Penária PN. Imajen Tatoli/Egas Cristovão

DILI, 28 jullu 2020 (TATOLI) – Iha ámbitu debate aplikasaun deklarasaun Estadu Emerjénsia (EE) iha Parlamentu Nasionál (PN), Sentru Integradu Jestaun Krize (CIGC, sigla portugés) aprezenta relatóriu durante implementasaun EE.

Iha loron 21 abríl 2020, CIGC funsiona hanesan Sala Situasaun iha kazu ezesaun konstitusionál ne’ebé previstu iha lejizlasaun Estadu Sítiu ka Estadu Emerjénsia.

Iha loron 30 juñu, Primeiru-Ministru, Taur Matan Ruak ofisialmente enserra ona servisu Sala Situasaun CIGC tanba Governu deside la estende EE ba dahaat.

Iha aprezentasaun, Capitão Mar e Guerra no atuál Diretór Institutu Defeza Nasionál (IDN), Donaciano Costa Gomes ‘Pedro Klamar Fuik’, apresia Líder Nasionál, Kay Rala Xanana Gusmão iha ámbitu prevensaun surtu COVID-19 iha Timor-Leste tanba ho inisiativa konsege husu ajuda rai-li’ur ba ekipamentu no ai-moruk kombate COVID-19.

“Ita halo akizisaun balun ba iha rai-li’ur maibé infelizmente ita la hetan resposta adekuada, ita-nia partidu polítika sira mós halo esforsu maka’as liuliu ita-nia Líder Nasionál Komandante Kay Rala Xanana Gusmão ne’ebé mak hakerek karta ida ba Repúblika Polulár Xina no nasaun ne’e responde kedas ho aviaun ida ne’ebé maka tula ekipamentu no ai-moruk ne’ebé ita utiliza to’o ohin loron,” relata membru CICG ne’e iha sala plenáriu, PN, tersa ne’e.

Nia konsidera, asaun líder karizmátiku ne’e presiza louva tanba hanesan inisiativa rasik.

“Líder Nasionál ne’e mós halo pedidu daruak ba Repúblika Populár Xina, maibé hetan resposta fali hosi sira nia fundasaun setór privadu, signifika katak ita iha esforsu tán hosi personalidade timor-oan sira seluk ne’ebé mak haree ba ita-nia país amigu Xina no sira mós haruka tán apoia ekipamentu no ai-moruk ba daruak,” haktuir Pedro Klamar Fuik.

Maski nune’e, nia dehan presiza haree difikuldade ne’ebé mak aloka ba Estadu no buka halo aprovizionamentu liuhosi organizasaun internasionál hanesan Programa Nasaun Unida ba Dezencolvimentu (PNUD) tanba to’o ohin loron ekipamentu balun seidauk to’o.

“Kuandu Estadu Emerjénsia termina no Sala Situasaun termina, ami la simu kualkér ai-morik hosi PNUD ne’ebé ita-nia Estadu halo akizisaun,” nia dehan.

Sala Situasaun mós konsege halo rekomendasaun atu sosa ekipamentu hosi Korea Súl maibé rezultadu laiha.

Nune’e mós, ladún iha kuadru jurídiku ne’ebé naton atubele suporta serbisu iha ámbitu implementasaun EE.

“Falta nesesáriu enkuadramentu jurídiku ne’ebé mak di’ak, liuliu iha klarividénsia polítika, diferénsia interpretasaun ba aplikasaun sistema finanseiru iha Estadu Emerjénsia maski ita utiliza sistema normál,” nia realsa.

Membru CIGC ne’e nota katak, iha nesesidade rekursu investimentu balun, hanesan presiza reforsa rekursu finanseiru alokadu ba Sala Situasaun.

“Maibé ida-ne’e liu ona tanba Sala Situasaun laiha ona. Bens no ekipamentu tenke hetan garantia ba ita-nia rain, ne’ebé mínimu iha stock ne’ebé mak sufisiente ba kualkér situasaun emerjénsia ba ekipamentu protesaun individuál hanesan ventiladór, tamba ventiladór konvensional ba kazu grave ita iha ida de’it ne’ebé mak apoia hosi Xina. Ventiladór móvel ne’e la adekuada atubele ajuda kazu grave,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here