Padre Martinho G. da Silva Gusmão.

DILI, 27 jullu 2020 (TATOLI)—Profesór Filozofia Étika no Polítika Institutu Superior Filozofia Teolojia (ISFIT) Dom Jaime Goulart, Dili, Pe. Martinho da Silva Gusmão, hateten durante TATOLI eziste tinan haat ne’e, TATOLI kontribui ona ba pensamentu krítiku liuhosi divulgasaun informasaun ba públiku ho atividade halibur infromasaun no hakerek notísia.

Martinho Gusmão hatutan, Tatoli tenke kontinua mantein ho pensamentu kritiku ne’e liuhosi atividade lee barak no rona didi’ak saida mak fonte sira ko’alia, atu nune’e jornalista sira bainhira hakerek karik hakerek ho krítiku mós.

“Durante TATOLI eziste tinan haat ne’e, TATOLI kontribui ona ba pensamentu krítiku. Tatoli tenke kontinua mantein ho ida-ne’e. Keta haluha atu lee barak no rona didi’ak fonte sira ko’alia, atu nune’e bele hakerek ho krítiku mós,” dehan Profesór Filozofia Étika no Polítika Institutu Superiór Filozofia Teolijia (ISFIT) Dom Jaime Goulart, Dili, Pe. Martinho da Silva Gusmão, ba Agêrncia TATOLI liuhosi WA, segunda ne’e.

Atu mantein pensamentu krítiku no hakerek krítiku, nia hatutan, atu sai eskritór di’ak jornalista sira tenke sai leitór ne’ebé krítiku. Tanba, nia dehan, dalaruma jornalista sira hakerek tiha notísia maibé sira nunka lee fali saida mak sira hakerek ona.

“Atu sai eskritór ne’ebé di’ak, uluk nanain ema ida sai lai leitór ne’ebé krítiku. Ha’u nota lalais kedas katak jornalista sira-ne’e hakerek hotu tiha maibé sira rasik lakohi lee fali saida mak sira hakerek ona. Tan ne’e mosu sala barak, to’o ninia títulu oin ida, ninia konteúdu oinseluk fali. Iha jornalista balun ne’ebé hakerek títulu ne’e hanesan “bomba atómika”, maibé ninia konteúdu hanesan fali rai-rahun mak su’ar hela. Ha’u hanoin, ema ne’ebé iha pensamentu krítiku ne’e hakerek mós analítiku. Ne’e katak, ita lee saida mak sira hakerek, ita hatene hosi hun to’o rohan, abut to’o sanak no dikin furak loos. Se jornalista ida mak rona buat seluk hosi fonte no mai hakerek bua seluk fali, ne’e katak jornalista lahatene rona, lahatene hanoin krítiku nune’e hakerek mós la analítiku,” Martinho Gusmão hateten.  

Jornalista ne’ebé hekerek krítiku, Martinho Gusmão esplika, bainhira jornalista ne’e hakerek asuntu ida, jornalista iha uluk lai baze dadus (data base). Katak, nia hatutan, jornalista ne’e hatene ona “Sé” mak nia sei ba husu, “Saida”  mak nia sei husu, “Bainhira” mak buat ne’e akontese iha tempu uluk, ohin loron ne’e mosu tan no aban bainrua nian, “Iha Ne’ebe” los mak buat ne’e akontese, no ikus liu “Oinsa” mak nia akontese no oinsá mak bele hasoru akontesimentu,  atu nune’e ema ne’ebé lee mós haree duni katak notísia ne’e iha kontinuidade.

Iha aniversáriu TATOLI ba dahaat (27 jullu 2016-27 jullu 2020) ne’e, Amu Martinho husu ba TATOLI tenke sai nafatin “Ahi Knulu” (sasulu) ba sosiedade hanesan bainhira profeta Moises lori povu ba sira-nia libertasaun ne’ebé Maromak hatudu dalan liuhosi “Ahi-Knulu” ne’ebé lakan iha nakukun laran.

“TATOLI tenki sai “Ahu Knulu”. Hanesan iha bainhira Profeta Moises lori Povu ba sira-nia libertasaun ne’eb’e Maromak hatudu dalan liuhusi “ahi knulu” ne’ebé lakan iha kalan nakukun. Nune’e mós, jornalista TATOLI no jornalizmu hanesan “ahi knulu” ida hodi hatudu naroman no leno ema-nia dalan atu tuir dalan ne’ebé loos,” nia dehan.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here